भांगरभूंय | प्रतिनिधी
पणजी : गोंय विधानसभेचें पावसाळी अधिवेशन फाल्यां सोमारा सावन सुरू. हें अधिवेशन १८ दीस चलतलें. विवीध प्रस्नांक लागून सरकाराची अधिवेशनांत कसोटी लागतली. ह्या अधिवेशनांत अर्थसंकल्प संमत करपा वांगडा चर्चा करून खात्यांच्या मागण्यांक संमती दितले.
पयले तीन दीस अर्थसंकल्पाचेर चर्चा जावन विनियोग विधेयक संमत करतले. उपरांत उरिल्ले १५ दीस खात्यांच्या मागण्यांक चर्चे उपरांत संमती दितले. अधिवेशनांत ७६८ तारांकीत आनी २१३० अतारांकीत प्रस्न आमदारां कडल्यान विचारल्यात. प्रस्नोत्तरा बगर शुन्य प्रहर, लक्षवेधी सुचवण्यो, परबीं दिवपी आनी आर्गां ओंपपी प्रस्ताव चर्चेक येतले. दर शुक्रारा पांच खाजगी थाराव, ह्या प्रमाण १५ थाराव चर्चेक येतले अशी म्हायती विधीमंडळ सचीव नम्रता उल्मन हांणी दिली.
कोवीड तशेंच हेर विवीध कारणांक लागून तीन, चार वर्सां अधिवेशन जावंक ना. हें अधिवेशन १८ दीस चलतलें. ताका लागून विवीध प्रस्नांचेर बरोच काळ चर्चा करपाची संद आमदारांक मेळटली. आसगांव घर मोडपाचें प्रकरण, कला अकादमीचें सदोश नुतनीकरण, स्मार्ट सीटीच्या कामाक लागून पणजेची जाल्ली अवस्था ह्या प्रस्नां वयल्यान अधिवेशन गाजपाचीं चिन्नां दिसतात. अधिवेशनांत येवपी सरकारी विधेयकां आजूनय निश्चीत जावंक ना, अशी म्हायती विधीमंडळ सचीव नम्रता उल्मन हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
