भांगरभूंय | प्रतिनिधी
दिवचल, प्रतिनिधी: भलायकेची जतनाय घेतना फकत दुयेंत पडल्या उपरांतूच उपचार घेवचे परस दुयेंत पडचें न्हय म्हणून आयज काळांत स्वताची भलायकी राखप गरजेचें. ताका लागून वखदां घेनासतना दुयेंस बरें जावपा खातीर नेचरोपेथी आनी योगीक सायन्स ह्या उपचारांक म्हत्व आयलां. तशेंच फिजिओथेरपीय आयज दरेका दुयेसांतल्यान लोकांक भायर काडपाक उपेगी थारता. हीच गरज वळखून सांखळे शारांत गोंयचें पयलें फिजिओथेरपी, नेचरोपेथी आनी योगीक सायन्स हॉस्पिटल येतलें अशी घोशणा मुख्यमंत्री डॉ. प्रमोद सावंत हांणी सांखळे केली.
गोवा कॉलेज ऑफ फिजिओथेरपी, नेचरोपेथी आनी योगीक सायन्सा वतीन सांखळे आदल्या सरकारी मुळाव्या भलायकी केंद्रांत सुरू केल्ल्या फिजिओथेरपी, नेचरोपेथी आनी योगीक सायन्सच्या ओपीडीचें उक्तावण केले उपरांत डॉ. सावंत उलयताले. ह्या वेळार माचयेर नगराध्यक्ष रश्मी देसाय, जिल्हा पंचायत सदस्य गोपाळ सुर्लकार, गोवा कॉलेज ऑफ फिजिओथेरपी, नेचरोपेथी आनी योगीक सायन्सचे चेअरमन संतोष मळीक, व्यवस्थापक डॉ. स्नेहा भागवत आनी हेर हाजीर आशिल्ले.
आदीं लोक आपलो फिटनेस ट्रेनर दवरताले. मात आयज भलायकेक लागून लोक आपलो योग ट्रेनर दवरतात. ताका लागूनच आयज संवसारीक पांवड्यार पाविल्ल्या योगाचें म्हत्व सगळ्यांनीच लक्षांत घेतलां. तशेंच नेचरोपेथी हो विशयूय पुराय भारतीय समजून घेतात.
२०३६ च्या ऑलिम्पिका खातीर प्रशिक्षीत फिजिओथेरपीस्ट तयार करपाचें ध्येय
देशांत आयुष मंत्रालय स्थापन जाल्या उपरांत आयुर्वेद तशेंच सैमीक उपचारांक बरेंच म्हत्वा मेळ्ळां. ही उपचार पध्दत आयज आंतरराष्ट्रीय पांवड्यार पावल्या.भारतांत २०३६ वर्सा जावपी ऑलिम्पिकांत उत्कृश्ठ खेळगडे तयार करपा वांगडाच उत्कृश्ठ फिजिओथेरपी प्रशिक्षक तयार करपाचें ध्येय दवरलां. ताची तयारी आतांच्यानूच सुरू केल्या अशेंय मुख्यमंत्र्यान मुखार सांगलें.
मुख्यमंत्री डॉ. सावंत हांचे हस्तुकीं फित कापून आनी दिवली पेटोवन ओपीडीचें उक्तावण जालें. येवकार डॉ. स्नेहा भागवत हांणी दिलो. ह्या केंद्रांतल्यान लोकांक उण्या दरांत बरी सेवा दितले अशें तांणी सांगलें. उपकार संतोष मळीक हांणी मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
