भांगरभूंय | प्रतिनिधी
हरमल, बातमीदार: गोंयचे राजकी स्थितींत कॉंग्रेस पक्षाक घटमूट जावपाची गरज आसा. दरेका मतदारसंघांत गट समिती आनी हेर समिती काडपाचें काम सुरू करपा खातीर पंचायत वाठारांनी बसका घेवन पक्ष घटमूट करपाचो निर्णय कॉंग्रेस कार्यकर्त्यांचे बसकेंत घेतलो.
पार्सेचे कॉंग्रेस फुडारी प्रदीप देसाय हांच्या घरा बसका जाली. ह्या वेळार रमाकांत खलप, बाबी बागकार, गट समिती अध्यक्ष नारायण रेडकार, आदले सरपंच रामचंद्र केरकार, मिंगेल फर्नांडीस, धाकटू नायक, मेलविन डिसोझा आनी हेर हाजीर आशिल्ले.
मांद्रें मतदारसंघांत कॉंग्रेस पक्षाक लोकसभा वेंचणुकेंत बरीं मतां मेळ्ळीं. कॉंग्रेस कार्यकर्त्यांनी दीस रात वावरून पक्षाचीं मतां वाडयलीं. ताका लागून दरेक कॉंगेस कार्यकर्ते आनी फुडार्यांनी मतदारसंघांनी संघटना बळीश्ट करपाक पावलां उबारचीं अशें प्रदीप देसाय हांणी सांगलें.
दरेका गांवांत बसका घेवपाची सुचोवणी
मांद्रें मतदार संघांत कॉंग्रेस पक्षा कडेन एकनिश्ठ कार्यकर्ते आनी मतदार आशिल्ल्यान लोकसभा वेंचणुकेंत उमेदवारी कोणायकूय जरी मेळिल्ली जाल्यार हात ह्या चिन्नाक बरींच मतां मेळटलींच आशिल्लीं. विधानसभा वेंचणुकेंत हात चिन्न नाशिल्ल्यान उणीं मतां मेळ्ळीं. म्हळ्यार कॉंग्रेस अस्तित्वांत ना अशी चर्चा आशिल्ली. मात मतदारां कडेन कनेक्ट रावपा खातीर तांचे मेरेन पावूंक जाय. आनी तांचे खातीर बसका घेवपाची सुचवणी आदले सरपंच रामचंद्र केरकार हांणी केली आनी हाजीर आशिल्ल्या फुडार्यांनी सहमती दाखयली.
सरकाराचे कार्यपद्धतीचेर आवाज काडून कॉंगेस पक्षाचें धोरण राबोवपाक जाय. राज्यांत सक्षम विरोधी पक्षाची भुमिका कॉंग्रेस पक्ष करता. गट पांवड्याचेरूय फुडारी आनी कार्यकर्त्यांनी वायट गजालींचेर आवाज करचो आनी प्रसंगा वेळार आंदोलनां करपाची कुवत दाखोवची अशें कॉंग्रेस फुडारी बाबी बागकार हांणी सांगलें.
कार्यकर्त्यांच्या सुचवण्यांचो आनी भावनांचो विचार करतले. तशेंच मतदारसंघांत कॉंग्रेसीचीं पाळां मुळां घट्ट करपा खातीर सगळ्या कार्यकर्त्यांनी साथ दिवची असो उलो गट समिती अध्यक्ष नारायण रेडकार हांणी मारलो.
ह्या वेळार रमाकांत खलप हांणी मार्गदर्शन केलें. हे बसकेक मंद्रेंच्या णवूय पंचायत वाठारांतल्या कार्यकर्त्यांनी वांटो घेतलो आनी सुचवण्यो केल्यो. निमाणें अध्यक्ष रेडकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
