भांगरभूंय | प्रतिनिधी
मडगांव, प्रतिनिधी: उटंगराच्या पावसाक लागून खारेबांद- मडगांवची आदली होमगार्ड विमल शिरोडकार हिच्या घराची वणट कोसळ्ळी. ती बिस्किटीचो पुडो हाडपा खातीर घरा भायर सरिल्ली तेन्ना ही घडणूक घडिल्ल्यान तिचो जीव वाटवलो. नगरसेवक महेश आमोणकार, आमदार दिगंबर कामत हांणी घडणुके सुवातेर भेट दिली. सध्या तिची रावपाची वेवस्था दुसरे कडेन करतले.
विमल शिरोडकार हांणी सुमार ३४ वर्सां होमगार्ड म्हणून काम केलें. लोकांची सेवा म्हणून हें काम केलां अशें ती सांगता. वणट सकाळीं सुमार साडे धा वरांचेर कोसळ्ळी. ह्या खोंपी वरीं घरांत ती फाटल्या ६५ वर्सां सावन रावता. वणट कोसळ्ळ्या उपरांत तिचें पुराय घरून मातयेभरवण जाल्ल्यान घरांतली गॅस, आल्मार, तीन खांटी, जेवणाचें सामान, कपडे अशें सगळें सामान मातये पोंदाक गेल्ल्याचें विमल हांणी सांगलें.
नगरसेवक आमोणकार हांणी सांगलें, विमल शिरोडकार ही बिस्कीटीचो पुडो हाडपाक पांच मिनटां पयलीं घरा भायर पडिल्ल्या तिचो जीव वाटवलो.
विमल हांच्या रावपाचो प्रस्न सध्या निर्माण जाला. ताची वेवस्था रोखडीच करतले अशेंय तांणी सांगलें.
मजगतीं, नावेलेचे मनोहर पर्रीकार स्टेडियमा लागसारा घराचेर झाड पडपाची घडणूक रातीं घडली. नुव्यां विजेचे खांबे कोसळिल्ल्यान घराच्या पांख्यावेले पत्रे सकयल येवपाची घडणूक घडली.
कोलवें, दवल्ले, फातोड्डें वाठारांतूय झाडां पडलीं
पावसाक लागून मडगांवां सयत आशिकुशीच्या वाठारांत खुबश्या सुवातांचेर झाडां पडलीं. दवल्ले, फातोड्डें, कोलवें हांगांय झाडां पडलीं. सध्या हांगा झाडां कुडशीक काडून रस्ते मेकळे करपाचें काम चालू आसा.
शिरोडकर हांच्या घराच्यो मातयेच्यो वणटी आशिल्ल्यान उरल्यात त्यो वणटीय पडपाची शक्यताय आसा. शिरोडकार हिका आलाशिरो दिवपाची गरज आसा, अशें उजो पालोवपी दळाचे अधिकारी गिल सुझा हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
