भांगरभूंय | प्रतिनिधी
पुरी, खबरां संस्था: ओडिशाच्या पुरी शारांतल्या श्रीजगन्नाथ देवळांत हालींच रथयात्रा जाली. आतां सगळ्यांचें लक्ष रत्नभंडाराचेर आसा. ४६ वर्सां उपरांत ओडिशाचो खजिनो उक्तो जातलो. लोकसभा आनी ओडिशा विधानसभा वेंचणुकेंत पुरींतलो रत्नभंडार हो म्हत्वाचो विशय आशिल्लो. राज्यांतल्या विधानसभा वेंचणुके वेळार भाजपानय तो उक्तो करपाचें आश्वासन दिल्लें.
ओडिशाचे कायदो मंत्री पृथ्वीराज हरिचंदन हांच्या मतान रत्न भंडाराची दुरुस्ती आनी मेजणी करपा खातीर वेगवेगळ्यो समिती घडयल्यात. रत्नांची मेजणी चालू आसतना रिझर्व्ह बँकेचे प्रतिनिधीय हाजीर आसतले. बाराव्या शेंकड्यांतल्या ह्या देवळाचो खजिनो निमाणो १९७८ वर्सा उगडिल्लो. त्या वेळार ह्या खजिन्यांतलीं रत्नां आनी रत्नां मेजपाक सुमार ७२ दीस लागिल्ले. पूण अंदूं तंत्रज्ञानाच्या आदारान मेजपाचे दीस उणे जावपाची शक्यताय आसा. पूण ह्या मेजपा वेळार देवाच्या दर्शनाक कसलोच त्रास जावचो ना.
रत्न भंडार नियंत्रण समितीचे अध्यक्ष न्यायमूर्ती विश्वनाथ रथ हांणी रत्नभंडार दनपरां उगडटले अशें सांगलें. चावयेन रत्नभंडाचें कुलूप उगडना जाल्यार तें मोडटले. तशेंच भितर सोरोप आशिल्ल्यान सोरोप इश्ट आनी वैजकी पंगड तैनात करतले.
जगन्नाथ हेरिटेज कॉरिडोर प्रकल्प सोबीतीकरण करतना देवळा भोंवतणीय सोरोप सांपडिल्ले. हें पुर्विल्लें देवूळ आशिल्ल्यान हांगा बारीक बारीक कांतरे पडल्यात. देखून ह्या फातरांनी सोरोप आसूं येतात. ताका लागून रत्नभंडार उगडटना सुरक्षिततायेची योग्य जतनाय घेवची पडटली. सोरोप ह्या खजिन्याची राखण करतात अशें म्हण्टात.
खजिन्यांत कितें आसा?
श्रीजगन्नाथ देवळाच्या रत्नांची निमाणी गणना १९७८ वर्सा जाली. श्री जगन्नाथ देवळ प्रशासनान (एसटीजेए) जारी केल्ल्या अहवाला प्रमाण रत्नभंडारांत तीन कोठयो आसात. सगळ्यांत भितरल्या कोठयेंत दवरिल्ल्या रत्नांचो केन्नाच उपेग जावंक ना. देखून खाशेल्या दिसां खातीर आनी उत्सवा खातीर भायल्या कोठयेचे अलंकार भायर काडटात. पयल्याच कोठयेंतले अलंकार देवाचे दिसपट्टे उपासने खातीर वापरतात. सगळ्यांत भितरल्या कोठयेंत ५० किलो ६०० ग्राम भांगर आनी १३४ किलो ५० ग्राम रुपें आसा. जाल्यार भायल्या कोठयेंत ९५ किलो ३२० ग्राम भांगर आनी १९ किलो ४८० ग्राम रुपें आसा. सद्याचे कोठयेंत ३ किलो ४८० ग्राम भांगर आनी ३० किलो ३५० ग्राम रुपें आसा.
एका अहवाला प्रमाण फाटल्या शेकड्यांत जग्गनाथ देवळाचें रत्न भांडार १९०५,१९२६ आनी १९७८ वर्सा उगडिल्लें. तेन्ना हांगच्या मोलादीक वस्तुंची वळेरी केल्ली. १९७८ च्या एका सर्वेक्षणा प्रमाण रत्न भंडारांत १४९ किलो परस चड भांगराच्यो वस्ती आनी २५८ किलो रुप्याचीं आयदनां आशिल्ल्याचें राज्य सरकारान सांगिल्लें. १२,८३१ वजनाच्यो भांगराच्यो वस्ती जातूंत मोलादीक रत्नांचोय आस्पाव आशिल्लो. २२,१५३ जड रुप्याचीं आयदनां आनी हेर जायत्यो वस्तू आशिल्ल्यो. अशें म्हणटात हीं सगळीं भांगरां- शिंगरां राजा- महाराजांनी देवाक दान केल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
