भांगरभूंय | प्रतिनिधी
पणजी: नीती आयोगान जाहीर केल्ल्या 2023-24 वर्साचे शाश्वत उदरगत लक्ष्य (एसडीजी) वळेरेंत गोंयाक देशांत तिसरो नंबर मेळ्ळा. वेगवेगळ्या निकशांचेर गोंयान वट्ट 77 गूण मेळयले. आयोगान हालींच हो अहवाल जाहीर केला.
केरळ आनी उत्तराखंड संयुक्तपणान 79 गूण मेळोवन पयले सुवातेर आसात. तमिळनाडू 78 गूण घेवन दुसरे सुवातेर आसा. हे वळेरेंत बिहार निमाण्या नंबराचेर आसा. नीती आयोग 30 डिसेंबराक एसडीजी इंडिया इंडेक्स आनी डॅशबोर्ड सुरू करतलो.
2018 वर्सा सावन निती आयोग सगळ्या राज्यांच्या आनी केंद्रशासीत प्रदेशांतल्या उदरगतीचें मुल्यांकन करता. हाचे खातीर शिक्षण, भलायकी, पर्यावरण, नितळसाण, मुळाव्यो सुविधा, गरिबी निर्मूलन अशा एसडीजीच्या 113 निकशांच्या आदाराचेर प्रगती मेजतात. हाचे उपरांत वट्ट 16 वेगवेगळ्या वाठारांनी जाल्ले प्रगतीचेर आदारून एसडीजी क्रमवारी जाहीर करतात. ह्या 16 वाठारांक 0 ते 100 मेरेन गूण मेळटात.
नीती आयोगाच्या 2020-21 वर्साच्या एसडीजी वळेरेंत गोंयचो चवथो नंबर आशिल्लो. त्या वर्सा गोंयाक 72 गूण मेळ्ळे. अंदूं तातूंत 5 अंकांची वाड जाल्या. अंदूं आयोगान गोंयाक ‘फ्रंट रनर’ वर्गांत दवरला. नितळ उदका पुरवण आनी नितळसाण ह्या मळार गोंयान शंबर टक्के गूण मेळयल्यात. तशेंच वीज आनी उदका पुरवण ह्या मळार गोंयान हेर राज्यां परस चड गूण मेळयल्यात.
पूण प्रदुशण आनी कोयर वेवस्थापनाचे नदरेन गोंयांत उणाव आयला. हाचे भायर ग्रीन अर्थवेवस्था, टिकावू मुळावी बांदावळ हातूंत गोंय फाटीं आसा. अहवाला प्रमाण दर मनशाक चड इंधन वापर, प्लास्टीक कोयर निर्माण आनी अन्न फुकट घालोवप ह्या वर्गांत गोंयाक उणे गूण मेळ्ळे, जाका लागून राज्याच्या एकंदर गुणांक परिणाम जालो.
पयले येवपाचो यत्न करुया : मुख्यमंत्री
एसडीजी वळेरेंत गोंय देशांत तिसऱ्या नंबराचेर पाविल्ल्यान गोंय सरकारान केल्ल्या यत्नांक फळ मेळ्ळां. राज्याच्या टिकावू फुडारा खातीर आमचे यत्न चालूच उरतले, अशें मुख्यमंत्री डॉ. प्रमोद सावंत हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
