भांगरभूंय | प्रतिनिधी
मडगांव, प्रतिनिधी ः बाणावले मारिया हॉला वटेन वचपी रस्त्यार शेनवारा दनपरां माड पडून बायल जखमी जाली. उपरांत तिका उपचारा खातीर हॉस्पिटलांत व्हेली. उजो पालोवपी दळान माड कुशीक करुन रस्तो येरादारी खातीर मेकळो केलो.
दनपारां देड वरांच्या सुमाराक माड पडलो. पडतना रस्त्याचे दुसरे वटेनच्या लायटींच्या तारांचेर पडिल्ल्यान दुचाकी वयल्या बाणावले सावन मडगांव वटेन वचपी बायलेचे तकलेक धपको बसलो. उपरांत तिचो दुचाकी वयलो ताबो गेलो आनी ती रस्त्यार पडली जाल्यार दुचाकी रस्त्या कुशीच्या गटारांत गेली. थळार हाजीर आशिल्ल्या नागरिकांनी एम्ब्युलन्स आनी उजो पालोवपी दळ आनी कोलवा पुलिसांक ह्या अपघाताची म्हायती दिली. जखमी जाल्लें बायलेक उपचारा खातीर हॉस्पिटलांत व्हेली. मजगतीं, उजो पालोवपी दळाच्या जवानांनी माड कुशीक करुन येरादारी खातीर रस्तो मेकळो केलो. जखमी बायलेचेर उपचार सुरू आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
