भांगरभूंय | प्रतिनिधी
कोरगांव, प्रतिनिधी ः देऊळवाडो- मांद्रेंच्या मुखेल रस्त्याचेर लायटीची लायन घालपा खातीर रस्तो खणिल्लो. पूण काम जाले उपरांत त्या जाग्यार पडिल्लें फोंडकूल पुरोवंक नाशिल्ल्यान तातूंत आतां पावसाचें उदक सांचून उरता. हाचो त्रास यो- वच करपी वाहनचालकांक तशेंच चलत वचपी लोकांक जाता.
काल सकाळीं यत्ता 6 वेंत शिकपी एक चली आनी तिचो बापूय ह्याच फोंडकुलांत पडून जखमी जाला. हे संबंदी थळाव्या पंचायतीन संबंदीत खात्याक विनवणी केली की काम जालें उपरांत पडिल्लें फोंडकुल भरचें. पूण पेडणें पीडब्ल्यू अधिकाऱ्यांनी तें आमकां लागना, तें थळाव्या पंचायतीन करचें अशी जाप दिली. हाचेर पंच, सरपंचांनी तिडक उक्तायल्या. संबंदीत खात्याचेर टिका करुन पीडब्ल्यूडीचे अधिकारी हाचेर लक्ष दिनात, देखून मांद्र्यां वेगवेगळ्या सुवातांचेर जायतीं फोंडकुलां पडल्यांत. हांतूत पडून जायते जाण जखमी जाल्यात अशें सरपंच प्रशांत नायक हांणी सांगलें.
गांवांतल्या जायत्या सुवातींनी पडिल्ली फोंडकुला संबंदीत खात्यांक दिसनात. हो एक तरेचो घोटाळो आनी ते लोकांच्या जिवा कडेन खेळ करतात. थळाव्या आमदारान सांगले उपरांतूय हे अधिकारी लक्ष दिनात. हें जर अशेंच चालू उरलें जाल्यार आमी रस्त्यार देंवतले आनी आंदोलन करतले, अशें तांणी सांगलें.
हें विशीं विचारपाक अधिकाऱ्यां कडेन संपर्क केलो तेन्ना तांणी जाप दिली ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
