भांगरभूंय | प्रतिनिधी
मडगांव, प्रतिनिधी ः मडगांवांतल्या स्टेट बँक ऑफ इंडिया शाखे लागसार खाजगी बशीन धपको दिल्ल्यान शीला बोटेकार (40) हे बायलेक मरण आयलें. बशीच्या ड्रायव्हराक पुलिसांनी ताब्यांत घेतला.
ही घडणूक शेनवारा सकाळीं 10:30 वरांचे सुमाराक घडली. मेळिल्ले म्हायती प्रमाण, शीला ही देवीची मूर्त माथ्यार घेवन दुकानदारां कडल्यान जें कितें मेळटाले तें सेवा म्हणून स्विकारताली. शेनवार आशिल्ल्यान सकाळीं तिणें पोरणें बस स्टँड वाठारांतल्या दुकानदारां कडल्यान पयशे घेतले, कांय फळां विकप्यांनी तिका केळीं दिलीं. ते उपरांत एसबीआय बँके कुशीक आशिल्ल्या जोतें दुरुस्ती करप्यां कडल्यान पयशे घेवन रस्तो हुंपतना खाजगी बशीन तिका धपको दिलो. ती रस्त्यार पडली आनी तिचे तकलेक घावो जाल्ल्यान खूब रगत गेलें.
मडगांव पुलिसांक हे घडणुकेची म्हायती मेळ्ळे उपरांत तिका हॉस्पिटलांत व्हेली, पूण तिका मरण आयिल्ल्याचें दोतोरांनी सांगलें. हे प्रकरणांत ड्रायव्हर उदय वडार हाका पुलिसांनी ताब्यांत घेतला. पुलीस निरिक्षक तुळशीदास नायक हांच्या फुडारपणा खाला फुडली चवकशी चालू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
