भांगरभूंय | प्रतिनिधी
आसाम, खबरां संस्था ः आसाम सरकारान राज्य सरकाराच्या बायलां कर्मचाऱ्यांक 180 दिसांची दत्तक सुटी (Adoption Leave For Women) जाहीर केली. म्हळ्यार भुरगें दत्तक घेवपी आवयक आतां 180 दिसांची सुटी मेळटली. हो निर्णय आसामाच्या मंत्रीमंडळांत घेतलो. ह्या निर्णया विशीं म्हायती दितना आसामाचे मुख्यमंत्री हिमता विश्व सरमा हांणी सांगलें, केंद्रीय नागरी सेवा (सुटी) नेम, 1972 च्या नेम 43 बी प्रमाण हो निर्णय घेतला. 1 वर्सां सकयल्या दत्तक घेतिल्ल्या भुरग्यांची योग्य जतनाय आनी ताका पोशण मेळपा खातीर मंत्रीमंडळान ही तरतूद केल्या. ते प्रमाण आसाम सरकाराच्या बायलां कर्मचाऱ्यांक 180 दिसांची दत्तक सुटी मंजूर केल्या.
मजगतीं, आसाम सरकारान नोव्हेंबरांत आपल्या कर्मचाऱ्यांक तांचे आवय-बापूय वा सासऱ्या वांगडा वेळ घालपा खातीर दोन दीस खाशेली सुटीय जाहीर केल्या.
भारतांत दत्तक सुटी येवजण कितें?
प्रसूती फायद्याच्या कायद्यांत केल्ल्या दुरुस्तींत 3 म्हयन्यां सकयल्या भुरग्याक दत्तक घेवपी बायल कर्मचाऱ्यांक 12 सप्तकांची दत्तक सुटी दिवपाची तरतूद आसा. सरोगसी वरवीं भुरग्यांक जल्म दिवपी (म्हळ्यार सरोगेसी वरवीं जल्मल्ल्या भुरग्याची जतनाय घेवपी) पालकांकय हीच तरतूद लागू जाता. ही सुटी भुरग्याक अर्जदाराच्या हातांत दिल्ल्या दिसा सावन लागू जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
