भांगरभूंय | प्रतिनिधी
नितीन गडकरीः लोकांच्यो समस्या समजून घेवन सोडयात, भाजपाक सल्लो
भांगरभूंय । प्रतिनिधी
पणजीः गोंय प्रदेश भाजपा खातीर फुडलो दोन वर्सांचो काळ परिक्षेचो आसा. ह्या काळांत गोंयचो सर्वे करून आमी खंय उणे पडटात, ते लोकां कडल्यान समजून घेवन लोकांच्यो समस्या सुटाव्यो करपाची विनवणी आपणे मुख्यमंत्री डॉ. प्रमोद सावंत हांकां केल्या. तशें जालें जाल्यार गोंयांत फुडलें सरकार भाजपाचेंच आसतलें, असो विस्वास केंद्रीय रस्ते येरादारी मंत्री नितीन गडकरी हांणी उक्तायलो.
ताळगांवां शुक्रारा आयोजीत भाजपाच्या राज्य कार्यकारिणी मेळाव्यांत गडकरी उलयताले. ह्या वेळार मुख्यमंत्री डॉ. प्रमोद सावंत, केंद्रीय मंत्री श्रीपाद नायक, राज्यसभा खासदार तशेंच भाजप प्रदेशाध्यक्ष सदानंद शेट तानावडे हांचे सयत मंत्री, आमदार, पदाधिकारी आनी कार्यकर्ते हाजीर आशिल्ले.
देशा सयत गोंयांत भाजप सध्या बरे स्थितींत आसा. गोंय भाजपाची वाड आपूण खूब वर्सांच्यान पळयता. फाटल्या 12 वर्सांच्या काळांत गोंयांतल्या भाजप सरकारान दर्जेदार कामगिरी केल्या. ताच्या आदाराचेर भाजपाक गोंयात निश्चीतूच आनीक बरे दीस येतले. पूण ते खातीर प्रदेश भाजपान सर्वे करून फाटल्या कांय वर्सां आमी खंय उणे पडले हाचो नियाळ घेवचो. तेच वांगडा राज्य सरकार आनी सरकारांतल्या घटकांच्या कामकाजाचेंय ऑडीट करचें, अशें मंत्री गडकरी हांणी सांगलें.
भाजपाक गोंयांत मेळिल्लें सूख सासणा खातीर तिगोवपाची जापसालदारकी कार्यकर्त्यांची आसा. तळागाळांतल्या लोकांची सर्वांगी उदरगत हेंच भाजपाचें उदिश्ट आसा, हें लक्षांत घेवन कार्यकर्त्यांनी काम करचें, सोय उलो मंत्री गडकरी हांणी मारलो. पुडल्या पांच वर्सांत गोंयांत 50 हजार कोटींचीं उदरगतीचीं कामा करपाचें ध्येय आपणें दवरलां. गोंयाक प्रामाणीक फुडाऱ्यांची गरज आसा. देशांतल्या पयल्या पांच सुंदर राज्यांत गोंयचो आस्पाव जावचो हे खातीर सगळ्यांनीच यत्न करपाक जाय, अशें मंत्री गडकरी हांणी सांगलें.
अर्थीक ऑडीटा परस कामकाजाचें ऑडीट म्हत्वाचें
मनीस जातीन न्हय जाल्यार गुणांनी म्हत्वाचो आसा. जात पाळिना हेच खातीर आपूण आतां मेरेन जिखत आयलां. भाजपान आपल्याक सदांच ‘पार्टी वीथ डिफरन्स’ची शिकवण दिल्या. अर्थीक ऑडिटा परस कामकाजाचें ऑडीट सदांत म्हत्वाचें आसता, अशें केंद्रीय मंत्री नितीन गडकरी हांणी सांगलें.
40 तल्यो 39 सुवातो जिखपाक शकतातः तानावडे
फाटले लोकसभा वेंचणुकेंत दोनूय मतदारसंघ जिखपाची मोख दवरून भाजपा रिंगणांत देंविल्लो. पूण कांय कारणांक लागून दक्षीण गोंयांत भाजप उमेदवाराक हार खावची पडली. अशें आसलें तरीय 40 तल्या 27 मतदारसंघांनी भाजपाक आघाडी मेळ्ळ्या. तेच खातीर येता ते विधानसभा वेंचणुकेंत भाजपा 39 सुवातो जिखपाक शकता, असो विस्वास प्रदेशाध्यक्ष सदानंद तानावडे हांणी उक्तायलो.
तमनाराक विरोध करप चुकीचेः मॉवीन गुदिन्हो
केंद्र सरकाराचे मजतीन गोंय सरकार गोंयांत साबार उदरगतीचे प्रकल्प चालीक लायता. पूण विरोधी पक्ष खूबश्या प्रकल्पांक फक्त विरोधा खातीर विरोध करता. तमनार सारकिल्ल्या गोंयच्या हिताच्या प्रकल्पांक फक्त विरोध करप चुकीचें आसा, अशें मंत्री मॉवीन गुदिन्हो हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
