भांगरभूंय | प्रतिनिधी
पत्रकार परिशदेंत दोगूय मंत्र्यांनी दिली म्हायती
भांगरभूंय । प्रतिनिधी
पणजीः पणजी आनी ताळगांवच्या बाह्य उदरगत आराखड्या वयल्यान (एपीडी) निर्माण जाल्लो वाद सोंपिल्ल्याचें मंत्री विश्वजीत राणे आनी बाबूश मोंसेरात ह्या दोगांनीय शुक्रारा पत्रकार परिशदेंत सांगलें. घोवा- बायलेचे सदांच वाद जातात. बाबूश आनी आपलें नातें तशेंच आसा, अशें मंत्री राणे हांणी सांगलें. जाल्यार राणे हांचे कडेन चर्चा करून हो प्रस्न सुटावो केला, अशें बाबूश हांणी सांगलें. गोंय मंत्रीमंडळांत फेरबदल जावपाची चर्चा चल्ल्या. तशेंच केंद्रीय मंत्री नितीन गडकरी गोंयांत आयल्यात. ह्याच वेळार भाजपाचे कोअर समितीच्या दोन दिसां आदीं जाल्ले बसकेंत नगर नियोजन खात्याच्या (टीसीपी) ओडीपी वयल्यान नगर नियोजन मंत्री विश्वजीत राणे हांचे कडल्यान पक्षान स्पश्टीकरण मागलें. ते प्रमाण मंत्री राणे हांणी स्पश्टीकरण लेगीत दिलें, पूण महसूल मंत्री बाबूश मोंसेरात हांणी आपल्याक विचारले बगर पणजी आनी ताळगांवां ओडीपी संबंदांतले प्रस्ताव मंजूर करचे न्हय, अशी भुमिका घेतली. मोंसेरात हांचे हे भुमिकेचेर मंत्री राणे हांणी लेगीत आक्रमक भुमिका घेतली. जांणी व्हड व्हड प्रकल्प उबारले तांणी नगर नियोजन खात्याचेर चेपण हाडचें न्हय, अशें स्पश्ट केलें. ताका लागून ह्या दोनूय मंत्र्यां मदलो वाद चव्हाट्यार आयिल्लो. पूण भाजप राज्य कार्यकारिणीचे शुक्रारा ताळगांवां जाल्ले बसकें उपरांत ह्या दोनूय फुडाऱ्यांना हो वाद सोंपिल्ल्याचें जाहीर केलें. विश्वजीत आनी आपूण एकाच कुटुंबांत आसात. पणजी आनी ताळगांवच्या ओडीपी संबंदांत आपणे तांचे कडेन चर्चा केल्या. हे दोनूय आराखडे बेगिनूच पुराय जातले, अशें मंत्री मोंसेरात हांणी जाहीर केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
