भांगरभूंय | प्रतिनिधी
बाजू मांडपाक मागलो वेळ; 15 वेर न्यायालयांत सुनावणी
पणजी: आसगांवां आरवाडेकार रावत आशिल्ल्या घराचो भाग मातयेभरवण केल्ल्या प्रकरणांत मुखेल सुत्रधार पुजा शर्माक अंतरीम थाकाय दिवपाक मुंबय उच्च न्यायालयाच्या गोंय खंडपिठान न्हयकार दिला. मजगतीं, गुन्यांव फांट्याचो विशेश तपास पंगड (एसआयटी) भारताचे डेप्युटी सॉलिसिटर प्रवीण फळदेसाय हांणी तिची कोठी गरजेची आशिल्ल्याची म्हायती दिवन बाजू मांडपा खातीर वेळ मागला. ते प्रमाण, न्यायालयान फुडली सुनावणी 15 जुलयाक दवरल्या.
आसगांवां सर्व्हे क्रमांक 135/1ए मदले जमनींत आगरवाडेकार कुटूंब रावत आशिल्ल्या घराचो भाग 22 जून दिसा मोडून उडयिल्लो. ते खातीर जेसीबी आनी बावन्सरांचो वापर केल्लो. आगवाडेकार कुटुंबांतल्या दोगांचें अपहरणूय केल्लें. ह्या प्रकरणांत पुजा शर्मा आड कागाळ दाखल केल्ली. हाची दखल घेवन हणजूण पुलिसांनी पुजा शर्मा सयत हेरां आड गुन्यांव दाखल केला.
हणजूण पुलिसांनी 25 जून दिसा पुजा शर्माक चवकशेक हजर रावपा खातीर नोटीस दिल्ली. उपरांत हें प्रकरण गुन्यांव फांट्या कडेन वर्ग केलें. तशेंच ह्या प्रकरणाचे चवकशे खातीर एसआयटीची स्थापणूक केल्या. पुजा शर्माक चवकशे खातीर हजर रावपा खातीर दोन फावटी नोटीस दिली. पूण ती हजर रावनासतना पणजेंतल्या उत्तर गोंय जिल्हो आनी सत्र न्यायालयांत अटकपूर्व जामीन अर्ज दाखल केलो. तो न्यायालयान भायरायलो.
उपरांत पुजा शर्मान मुंबय उच्च न्यायालयाच्या गोंय खंडपिठांत धांव घेवन भायरायिल्ल्या आदेशाचो पुनर्विचार करपाची मागणी केली. सत्र न्यायालयान आदेश जारी करतना कागाळदारान कागाळ फाटीं घेतली हाची दखल घेतली ना. तशेंच मुखेल सुत्रधार ख्वाजा हाणें न्यायदंडाधिकाऱ्या मुखार दिल्ल्या जबाबाची दखल घेतली ना. तशेंच राजकी हस्तक्षेप तशेंच शर्मा हिच्या समर्थनार्थ आशिल्ले बाजूची दखल घेवंक नाशिल्ल्याचो दावो केलो.
ह्या संदर्भांत न्यायालयांत सुनावणी जाली तेन्ना शर्मा वतीन ज्येश्ठ वकील सुरेंद्र देसाय हांणी वयले दावे करून अंतरीम थाकाय दिवपाची मागणी केली. जाल्यार एसआयटी वतीन भारताचे डेप्युटी सॉलिसिटर प्रवीण फळदेसाय हांणी शर्मा हिची कोठी गरजेची आशिल्ल्याचो दावो केलो. तशेंच हे विशींची बाजू मांडपा खातीर वेळ मागलो. हाची दखल घेवन न्यायालयान फुडली सुनावणी 15 जुलय दिसा दवरल्या.
मजगतीं, सुनावणी पुराय जाले उपरांत भांगभूंयच्या प्रतिनिधीन भारताचे डेप्युटी सॉलिसिटर प्रवीण फळदेसाय हांचे कडेन संवाद सादून शर्माच्या चेपणां विशीं विचारलें तेन्ना मुख्यमंत्री डॉ. प्रमोद सावंत राज्याचे मुख्यमंत्री आशिल्ल्यान कायदो आनी सुवेवस्था राखपाची जापसालदारकी तांचे कडेन आसा. ताका लागून तांणी घटने संदर्भांत केल्ल्या विधानांत कांयच गैर ना. तशेंच ताचो परिणाम तपासाचेर जावचो ना अशें स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
