भांगरभूंय | प्रतिनिधी
मडगांव: आकें मडगांवां उजो पालोवपी दळाचे कचेरे मुखार माड पडून अल्टो मोटारीचें 60 हजारांचें लुकसाण जालें. हातूंत पांच हजारांची मालमत्ता वाटावपाक दळाक येस आयलें. तशेंच आनीक दोन कडेन झाडां पडपाच्यो घडणुको घडल्यो.
मेळिल्ले म्हायती प्रमाण मडगांवां आकें वाठारांतल्या उजो पालोवपी दळाचे कचेरे मुखार आशिल्लो माड अल्टो मोटारी सयत राखणे वण्टीचेर पडलो. हातूंत मोटारीचो वयलो भाग चेपलो. तशेंच राखणे वणत कोसळ्ळी हातूंत मोटारीचें सुमार 60 हजारांचें लुकसाण जालें.
तशेंच मडगांव रवींद्र भवन रस्त्यार झाड पडिल्ल्यान येरादारी आडाविल्ली. मडगांव उजो पालोवपी दळान झाड मारून कुशीक काडलें. तशेंच दनपारां नुवें रुमडार वाठारांत माड रस्त्यार पडलो. हातूंत कोणाकूच दुखापत जाली ना. पूण रस्त्या वेले येरादारीक आडमेळीं आयिल्ली. मडगांव उजो पालोवपी दळान माड मारून कुशीक काडलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
