भांगरभूंय | प्रतिनिधी
फोंडें: गोंय मंत्रीमंडळांत 4 मंत्री आशिल्ल्या फोंडें म्हालांत लोकांच्यो समस्या वाडल्यात तांचे प्रस्न विधानसभेंत मांडटलों. लोकांचें प्रस्न आयकून घेवपाक मंत्र्यांक वेळ ना. ताचे वेल्यान सरकार सर्व सामान्य लोकांचें ना. मंत्र्यांनी केल्ले खूबशे घोटाळे येता त्या विधानसभा अधिवेशनांत उक्तें करतलों अशें गोवा फॉरवर्डाचे आमदार विजय सरदेसाय हांणी सांगलें.
फोंडें म्हालांत 4 मंत्री कार्यरत आसतना गोवा फॉरवर्डाचे आमदार विजय सरदेसाय हांणी आयोजीत केल्ल्या जनता दरबाराक लोकांनी हाजेरी लावन लोकांक सतावपी समस्या मांडल्यो. ह्या वेळार राजेश वेरेंकार, दुर्गादास कामत, अॅड. हृदयनाथ शिरोडकार, अकबर मुल्ला आनी हेर मानेस्त हाजीर आशिल्ले.
फोंड्यां उपजिल्हो हॉस्पिटलांत दुयेंतींक गरजेची सुविधा मेळना. गरजू दुयेंतीक तत्काळ गोमॅकाँत व्हरपाची वेळ येता. तशेंच रस्त्यांची जाल्ली दुदर्शा वाहन चालकां खातीर तकलीफोड थारल्या. बेतोड्यां बायपास रस्त्याचें रुंदीकरण वादांत सांपडलां. रुंदीकरण करतल्या रस्त्याचेर अपघाताचें सत्र सुरूच आसा. लोकांच्यो समस्या येता ते विधानसभा अधिवेशनांत निश्चीत मांडटलों. तशेंच कांय मंत्र्यांचे घोटाळे विधानसभा अधिवेशनांत गाजतले अशें आमदार विजय सरदेसाय हांणी सांगलें.
सद्याच्या मंत्रीमंडळांत कांठार पास जाल्ले खूबशे आमदार आसात. तांकां लोकांच्या समस्यांचें पडून गेल्लें ना. सरकार सर्व सामान्य लोकांक न्याय दिवपाक अपेशी थारलां. म्हालांत चार मंत्री आसून लेगीत थळावे लोक विवीध प्रकल्पांक विरोध करीत आसा. ताचे वेल्यान वेंचणुके वेळार लोक लेगीत विचार करून उमेदवाराक मतदान करीत आशिल्ल्याचें आमदार विजय सरदेसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
