भांगरभूंय | प्रतिनिधी
पणजी : विधानसभेच्या पावसाळी अधिवेशना खातीर वट्ट 2909 प्रस्न आयल्यात. तातूंत 786 तारांकीत जाल्यार 2123 अतारांकीत प्रस्न आसात. अधिवेशनांत आमदारांच्या 15 खासगी थारावांचेर चर्चा जातली, अशी म्हायती गोपांनी दिली.
गोंय विधानसभेचें पावसाळी अधिवेशन 15 जुलयच्यान सुरू जाता. 18 दीस चलपी अधिवेशनांत पयले 3 दीस अर्थसंकल्पाचेर चर्चा जातली. विनियोग विधेयक संमत जाले उपरांत 15 दीस खात्यांच्या मागण्यांचेर चर्चा जावन संमती मेळटली. शुक्रारा खासगी कामकाजाचो दीस आशिल्ल्यान खासगी थाराव चर्चेक येतले. दरेका शुक्रारा 5 अशें 15 खासगी थाराव चर्चेक येतले, अशी म्हायती सभापती रमेश तवडकार हांणी दिली.
पयलीं भशेन सगल्या पक्षांच्या आमदारांक उलोपाची संद मेळटली. दरेका पक्षाक उलोवपा खातीर दर दिसा 30 मिण्टांचो वेळ मेळटलो. अधिवेशनांत येवपी सरकारी विधेयकां अजून निश्चीत जावपाचीं आसात. दर दिसा 2 लक्षवेधी सुचोवण्यो चर्चेक येतल्यो. तशेंच 7 ते 8 झिरो अवराचे उल्लेख जातले.
आसगांव घर मोडपाचें प्रकरण, कला अकादमी नुतनीकरणाचो दर्जो, स्मार्ट सिटीक लागून पणजेची आवतिकाय, म्हादय पात्राचे प्रवाह समितीन केल्ली पळोवणी हे विशय गाजपाचीं चिन्नां आसात. कला अकादमी नुतनीकरण कामाचेर कलाकार लेगीत समाधानी नात. कोट्यांनी रुपया मोडून काम सारकें जावंक ना, असो आरोप जाता. हो विशय बरोच तापतलो, अशीं चिन्नां आसात. अधिवेशनांत प्रस्नाच्यो जापो 48 वरां पयलीं मेळपाक जाय. जापो उसरां मेळिल्ल्यान अभ्यास करपाक मेळना, अशी कागाळ पयली सावन विरोधी आमदारांची आसा. प्रस्नांच्यो जापो आमदारांक आदले दिसाच मेळटात. कांय प्रस्न तरेकवार खात्या संबंदीचे आसतात, हाका लागून जाप दिवपाक कळाव जाता, अशें सभापतीन सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
