भांगरभूंय | प्रतिनिधी
-धरणांच्या उदकाच्या सांठ्यांत वाड
पणजीः दोन दीस व्हड पावस पडल्या उपरांत शुक्रारा परतून राज्यांत दडकांनी पावसाक सुरवात जाली. राजधानी पणजे 9 वरांत 2 इंचा मेरेन पावस पडलो. पिळर्ण 1.55 इंच आनी पोरणें गोंया 1.15 इंच पावसाची नोंद जाल्या. सेगीत पडपी पावसाक लागून राज्यांतल्या अंजुणें आनी हेर धरणांचो उदकाचो सांठो वाडला. पावसाक लागून राज्यांतल्या बऱ्याच वाठारांनी झाडां पडून ल्हान ल्हान लुकसाणीच्यो घडणुको घडल्यो.
जायते सकयले वाठार उदकान भरिल्ले उरले. पावसाक लागून जायत्या रस्त्यांचेर येरादारी मंद आशिल्ली. हवामान खात्यान 13 आनी 14 जुलयाक व्हड प्रमाणांत पावस पडपाचो अदमास काडला. ते प्रमाण ह्या दोन दिसां खातीर ऑरेंज अलर्ट जारी केला. 15 आनी 16 जुलयाक येलो अलर्ट जारी केला.
पणजे शुक्रारा चडांत चड तापमान 30.1 आनी उण्यांत उणें 25 डिग्री सेल्सियस नोंद जालां. मुरगांवां चडांत चड तापमान 28.8 अंश जाल्यार उण्यांत उणें तापमान 24.6 अंश आसा. राज्यांत चडांत चड तापमान 26 ते 28 अंश आनी फुडल्या पांच दिसां खातीर उण्यांत उणें तापमान 24 अंश आसपाची शक्यताय आसा. पणजे शुक्रारा सापेक्ष आर्द्रता 98 टक्के आशिल्ली. फुडले पांच दीस सापेक्ष आर्द्रता 92 ते 98 टक्क्यां मदीं उरपाची शक्यताय आसा.
राज्यांत 1 जून ते 12 जुलय ह्या काळांत सरासरी 65.20 इंच पावस पडला. वाळपय सगळ्यांत चड 77.72 इंच पावस पडला. सांखळे 73.98 इंच, सांगें 72.70 इंच, काणकोणां 68.50 इंच, फोंडें 66.73 इंच, म्हापशें 65.53 इंच, पेडणें 65.32 इंच, मडगांवां 63.38 इंच आनी पणजे 62.66 इंच पावस पडला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
