भांगरभूंय | प्रतिनिधी
म्हापशें, प्रतिनिधी ः रेवोड्यां मंत्री नीळकंठ हळर्णकार हांची गाडी आडोवन तांचे सयत आनी पीएसओ आनी कार चालका कडेन वाद घाल्ल्या प्रकरणांत कोलवाळे पुलिसांनी अटक केल्ल्या यूट्यूबर दुबावीत गौरव बक्षी (४७, रा. ताळगांव) हाची म्हापशें न्यायालयान सशर्त जामिनाचेर सुटका केली. दोन म्हयने रेवाड्यां प्रवेश करचो न्हय अशें न्यायालयान ताका सांगलां. १५ हजार रूपया हमी रक्कम आनी तितलेच रक्कमेचो हमीदार, आठ दीस सकाळीं कोलवाळे पुलीस स्टेशनांत हाजेरी लावपाचे आनी हेर अटी घालून न्यायालयान हो जामीन मंजूर केला.
सरकारी पक्षान ह्या जामीन अर्जाक हरकत घेतिल्ली. तशेंच दुबाविताची गाडी जप्त करपाचो आदेश दिवपाची मागणी केल्ली. मात न्यायालयान ती भायर मारली.
मजगतीं, ही घडणूक बुधवार १० जुलयाक सांजेवेळार ४.०५ वरांचेर रेवोडा पंचायत कार्यालया मुखारच्या अशीर रस्त्यार घडिल्ली. मंत्री हळर्णकार हांगा झाडां रोवपाचे कार्यावळीक आयिल्ले. तांची गाडी आडोवपा वांगडा तांचे पीएसओ आशिल्ले पुलीस कॉन्स्टेबल कागाळदार रोहन परब हांचे सयत गाडी चालक आनी मंत्र्यां कडेन दुबावीत बक्षी हांणी वाद घाल्लो.
ह्या प्रकरणांत पुलिसांनी गौरव बक्षी हांचे आड भारतीय न्याय संहितेच्या १२६ (२), २२१ आनी १३२ कलमा खाला गुन्यांव नोंद करून ताका काल अटक केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
