भांगरभूंय | प्रतिनिधी
मडगांव, प्रतिनिधी : सासश्टी वाठारांतले नेण्टे चलयेचेर लिंगीक अत्त्याचार केल्ल्या प्रकरणांत कुंकळ्ळी पुलिसांनी दुबावीत शिवानंद मौर्य (२३, रा. उत्तरप्रदेश) हाका अटक केल्या. फुडलो तपास सुरू आसा.
सासश्टी वाठारांत लिंगीक अत्याचाराच्या प्रकरणांत वाड जातना दिसता. फाटल्या दोन म्हयन्यांचो विचार केल्यार सासश्टींतल्या मडगांव, कोलवें, मायणा कुडटरे पुलीस स्टेशनांत लिंगीक अत्याचाराचीं बरींच प्रकरणां नोंद आसात. शिवानंद मौर्या ह्या तरणाट्यान पिडेस्त चलये कडेन वळख वाडोवन तिचे कडेन संबंद दवरले आनी तिका गुरवार केली. ती चली हॉस्पिटलांत उपचारा खातीर गेली तेन्ना वैजकी अधिकार्यांनी हे घडणुकेची म्हायती कुंकळ्ळी पुलिसांक दिली. पुलिसांनी चलयेच्या कागदपत्रांची पळोवणी केली तेन्ना ती नेण्टी आशिल्ल्याचें कळ्ळें. हे विशीं दुबावितां आड गुन्यांव नोंद केलो आनी ताका अटक केली. पुलीस निरीक्षक डायगो ग्रॅसिअस हांच्या मार्गदर्शना खाला फुडलो तपास चलता.
दोन म्हयन्यांनी चार प्रकरणां
मायणा कुडटरें पुलीस स्टेशनाचे हद्दीत फाटल्या दोन म्हयन्यांत चार लिंगीक अत्याचाराचीं प्रकरणां नोंद आसात. एके नेण्टे चलयेक लग्न जाता अशें सांगून कोण नाशिल्ले सुवातेर व्हरून लिंगीक अत्त्याचार केल्ल्या प्रकरणांत पुलिसांनी दुबावीत साल्दोन फालेरो (२५) हाका अटक केल्या.
दुसर्या प्रकरणात एके सोळा पिरायेचे नेण्टे चलयेचेर लिंगिक अत्त्याचार केल्ले विशीं आयिल्ले कागाळी उपरांत पुलिसांनी सां जुझे दी आरीयाल हांगाच्या मेलकेश (२१) हाचेर कारवाय केली. कोलवें एक प्रकरण नोंद आसा. पिडेस्ताचे पालक कर्नाटकांतले आसात. राजेश चव्हाण (१९) हाणें नेण्टे चलये कडेन इश्टागत केली. तिचे गैरफायदो घेवन लिंगीक अत्त्याचार केले. उपरांत पिडेस्ताची भलायकी इबाडिल्ल्यान तिचेर दक्षीण गोंय जिल्हो हॉस्पिटलांत उपरांत बांबोळेच्या गोमॅकोंत उपचार केले. ह्या प्रकरणांतल्या दुबाविताचो सोद कोलवें पुलीस घेतात. मडगांव पुलीस स्टेशनाचे हद्दींत संतोष रायकार ह्या नावेलेच्या ५७ वर्सां पिरायेच्या मनशान १५ वर्सां पिरायेचे चलयेक मजत करपाचें सांगून लिंगीक अत्त्याचार केले. उपरांत तिका रेल्वे स्टेशन वाठारांत हाडून सोडली. मडगांव पुलिसांनी दुबाविताक अटक केल्या.
२० परस चड प्रकरणां
दक्षीण गोंयचो विचार केल्यार जानेवारी ते मे म्हयन्याच्या आंकडेवारी प्रमाण वेर्णें पुलीस स्टेशनाचे हद्दींत मायणा, कुडटरे आनी वास्को पुलिशेंत दोन जाल्यार कोलवें, फातोड्डें, केपें, कुडचडें, काणकोण, फोंडें, म्हार्दोळ आनी कुळें पुलीस स्टेशनाचे हद्दींत लिंगीक अत्याचाराचीं प्रकरणां नोंद जाल्यांत. वट्ट १६ प्रकरणां मदल्या एकाय प्रकरणाचो तपास पुराय जावंक ना. तशेंच जून आनी जुलय म्हयन्यांत कोलवें, मडगांव, कुंकळ्ळें, मायणा कुडतरें पुलीस स्टेशनांत प्रकरणां नोंद जाल्यांत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
