भांगरभूंय | प्रतिनिधी
मुंबय, खबरां संस्था : सध्या महाराष्ट्रांतूच न्हय, तर देशभरांत प्रशिक्षणार्थी आयएएस अधिकारी पूजा खेडकर हिचें प्रकरण गाजता. सरकारान तिची पुणेंच्यान बदली केल्या. आतां तिच्यो अडचणी आनीक वाडपाची शक्यताय आसा. कारण केंद्र सरकारान खेडकर प्रकरणाची चवकशी करपाक एक वांगडी समिती स्थापन केल्या. अतिरिक्त सचीव ही चवकशी करतले. पूजा हिची निवड कशी जाली, तशेंच तिचेर आशिल्ल्या आक्षेपांचीय चवकशी जातली. हो अहवाल दोन सप्तकां भितर सादर करपाक सांगला.
प्रकरण नेमकें कितें?
पुणे जिल्हाधिकारी कार्यालयांत प्रशिक्षणार्थी आयएएस पदाचेर रुजू जाल्ली पूजा दिलीप खेडकर हांणी युपीएससीचे 2022 चे परिक्षेंत देशांत 821 वो रँक मेळयिल्लो. ह्या क्रमांकाचेर आयएएस पद मेळप कठीण आसतनाय पुजान तें मेळोवपाक ‘ओबीसी नॉन क्रीमिलेयर’ आशिल्ल्याचें प्रमाणपत्र दिलें. तशेंच दोळ्यांनी सारकें दिसना, मानसीक दुयेंस आसा,अशेंय सांगले. ताचेर ताका आयएएस पद मेळ्ळें. तिच्या बापायन (आदले आयएएस अधिकारी) हांणी द. अहमदनगर मतदारसंघांतल्यान वंचित बहुजन पक्षा वतीन लोकसभा वेंचणूक लढयली. त्या वेळार तांणी सादर केल्ल्या प्रतिज्ञापत्रांत तांची संपत्ती 40 कोटी आशिल्ल्याचें आनी शेतांतल्या पिकां वरवीं वर्साक 43 लाख रुपया मेळटात अशें जाहीर केल्लें. खुद्द पुजाचे तीन फ्लॅट, शेतजमीन आसा. ताचें मोल उणेंच 20 कोटी रुपयां वयर आसा, अशें एनडीटीव्हीन आपल्या खबरांनी म्हणलां. ताका लागून पूजा हांणी सादर केल्ल्या नाॅन क्रीमिलेयर प्रमाणपत्राचेर प्रस्नचिन्न निर्माण जालां. वर्साक आठ लाख रुपया उत्पन्न आशिल्ल्यांकूच तें मेळटा. पूजा हांच्या बापायन 40 कोटींचें उत्पन्न दाखयलां मागीर तांकां हें प्रमाणपत्र कोणें आनी कशें दिलें, हे विशींय प्रस्नचिन्न उबें रावलां.
वैजकी चाचणेक येवंक ना
स्पोर्ट्स ऑथॉरिटी ऑफ इंडियाच्या माध्यमांतल्यान असिस्टंट डायरेक्टर इन स्पोर्ट्स ऑथॉरिटी इंडिया ह्या पदाचेर पूजा हांची 2021 वर्सा निवड जाल्ली. ह्या वेळार तांणी ओबीसी आनी पीडब्ल्यूबीडी 1 (एलव्ही) हें दिव्यांगत्व आशिल्ल्याचें सांगिल्लें. मात 2022 त जाल्ले युपीएससी परिक्षेच्या निमण्या निकालांत निवड जातना तांणी ओबीसी आनी पीडब्ल्यूबीडी 1 (एलव्ही) हें दिव्यांगत्व दाखयिल्लें. तांकां स खेपो हाचे तपासणे खातीर आपोवनूय तांणी वैजकी चाचणेक हाजिरी लावंक ना. ताका लागून तांच्या विरोधांत निकाल दिल्लो. पूण पूजा हांणी दुसऱ्या वैजकी अधिकाऱ्याचें प्रमाणपत्र दिवन आयएएस पद मेळयिल्लें.
होम केडर मेळ्ळो
आयएएस अधिकाऱ्याक संबंदीत रँकप्रमाण होम केडर मेळना. पूण तांकां महाराष्ट्र कॅडर मेळूनय तांकां तांच्याच जिल्ह्यांत प्रशिक्षणार्थी म्हूण कशें नेमलें, असो प्रस्न कांय जाणकारांनी उक्तायला. कांय राजकी फुडाऱ्यांनीय ह्या पुराय प्रकरणाची चवकशी जावची अशी मागणी केल्या.
मसुरी हांगा मुळावें प्रशिक्षण घेतकच तांकां भंडारा जिल्ह्यांत पोस्टींग मेळ्ळें. मात तांणी रोखडीच पुणें जिल्ह्यांत बदली करून घेतली. हाचे फाटल्यान कोण आसा, ताचोय सोद घेवप चालू आसा.
पूजा हांणी आपले खाजगी गाडयेचेर तांबडो दिवो लायिल्लो, जिल्होधिकारी रजेर गेल्लो ताच्या केबिनांत स्वता बसपाक लागली. ताचें फर्निचर बदल्लें, अशेय आरोप जाल्यात. हे विशीं ती अधिकाऱ्यांक व्हाॅट्सअॅपाचेर मॅसेजी धाडटाली, त्यो पत्रकारांक मेळ्ळ्यात. तिची जिल्होधिकाऱ्यान राज्य सरकारा कडेन कागाळ केली आनी हो सगलो प्रकार उक्ताडार आयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
