कश्ट्याक पेज न्हिदतल्याक शीत

भांगरभूंय | प्रतिनिधी

जे आपले लागणुकेक पाळो दिनात तांचो थातो मातो करतात. गायकाक थंयच सांडून कोरस गायतल्याक “सिंगर ऑफ द इयर” पुरस्कार भेटोवपी रडी आमचो समाज. केन्ना सुदारतलो?

धर्तरेर जगतल्या दर एका मनशाची पयली लागणूक ती म्हणल्यार धर्तरे वेल्या जीव सृश्टीचो सांबाळ करप.
 सैमाचें संवर्धन करप. ही धर्तरी आमकां भरभरून दीत आसता. तिचो विध्वंस करपाचो आमकां कोणाकूच अधिकार ना. हो सैम आमकां खूब मजत करता. पूण आमी मनीस सामकें पडमूर. आमी आमच्या सुवार्थाक लागून ताका उरबडीत आसात. समाजीक भान म्हणटांत तें मातूय ना. सांगपाचें म्हणल्यार खरो निर्मळ, निसुवार्थी मनिसूच आपणाल्या कर्तव्याक प्रामाणीकपणान पाळो दितना दिश्टी पडटा. चडशे लोक समाजीक लागणूक विसरुनूच गेल्यात. आयज मनीस दिसान दीस संकुचीत जायत आसा. ताका कोणाच कडेन देणे घेणे आसना. चडशे लोक एकसुरी जीण जगप पसंद करतात. वयलेचाराक एकामेकाक हटकीतना दिसतले. पूण भितरल्यान कोणाकूच कोणाचे बरें जाल्लें सोंसना. चडावत लोकांचे दाखोवपाचे दांत वेगळे आनी खावपाचे दांत वेगळें. तुकाय बरो आनी म्हाकाय बरो असल्या मनश्यांक तुका वेळारूच पारखुवपाक कळपाक जाय. नातर असले वृत्तीचे लोक तुजो केन्ना केंसान गळो कापीत हाचो भरवंसो ना. एक वेळ मोनजातीचेर विस्वासू येता. पूण मनशाचो भरवंसो दिवं नजो. इतलीं मनशान पत व्हगडायल्या. रगताच्या नात्या वेलो विस्वास दिसान दीस उणो जायत चल्ला थंय समाजाचेर कोण विस्वास दवरतलो?
प्रत्येक अधिकाऱ्यान आपआपले लागणुकेक प्रामाणीकपणान पाळो दीत जाल्यार सगळें सुरळींत चलतलें. वंयूच जर शेत खांवंक लागली जाल्यार कोणा कडेन न्याय मागपाचो? भ्रश्टाचार सकयल सावन वयर मेरेन आनी वयर सावन सकयल मेरेन बेन्नुल्ल बळावची तसो बळावला. भ्रश्टचाराची बेन्नुल्ल मुळां सावन हुमटावपाची गरज आसा. ते खातीर समाजीक जाण जाय. म्हाका कित्याक पडलां अशें म्हणूंक फावना. ज्या ज्या मळार मनीस काम करता थंय थंय तांणी शें प्रतिशें आपले लागणुकेक पाळो दिवंक जाय. धरुया एखादो शिक्षक आसा, जाल्यार तांणी विद्यार्थ्याक प्रामाणीकपणान शिकोवपाक जाय. शिकोवप आनी तेंवूय परफेक्ट. आपल्या विशयाक 100 टक्के न्याय दिवपाक जाय. ही ताची पयलीं लागणूक.
शिकोवपाक हळद लावन तांणी बाकीचीं कामां करपाक फावना. भुरग्यांच्या अभ्यासाचे खळे करून तांच्या पालकांचे बरेंपण शिक्षकांनी कित्याक घेवंक जाय? भोळ्या बाबड्या पालकांक शिक्षकांनी कित्याक फटोवंक जाय? पालक शिक्षकाक देव मानून व्हड विस्वासान आपल्या भुरग्याचो फुडार घडोवंक शाळेंत घालतात. त्या पालकांचो शिक्षकान अपेक्षाभंग करूंक जायना. आपलो एखादो विद्यार्थी नापास जातकच शिक्षकाक दुख्ख जावपाक जाय. पूण आयच्या कांय शिक्षकांक मातूय लज दिसना. आयचो चडसो शिक्षक वर्ग हो पगारा खातिरूच नोकरी करता काय कितें असो प्रस्न पडले बगर रावना. आयचो समाज इबाडपाक कांय शिक्षकूय आनी शासनूय जबाबदार आसा. कारण शिक्षकान आपणाले लागणुकेक सारको पाळो दिल्लो ना. तशीच गजाल पत्रकारितेंतूय. वर्तमान पत्र हो लोकशायेचो चवथो खांबो. निर्भीड पत्रकार वा पत्रकारिता आयज दुर्मीळ जाल्ली आमी पळयतात. सुवार्थी समाजसेवा दिसान दीस वाडत आसा. कोणा गरजवंताक मजत करप, आनी मजत करतनाचो फोटो काडप आनी पेपरार घालप, आनी आपलोच उदो उदो करप हाका लागणूक म्हणिनात. खरो समाजसेवक प्रसिध्दी पसून चार हात पयसूच रावता, आनी मुकाट्यांनी कामां करता. ते समाजसेवक आपलेच टुणटुणें वाजयनात. उजव्या हातान दिल्लें दान दाव्या हाताक कळपाक जायना. ताका दान म्हणटात. आयचे कांय राजकारणी आपलींच पोटां भरपी. तांकां लोकांचे मातूय पडिल्लें आसना. ते आपल्याे सात पिळग्यो सुसेगाद जगतल्यो अशे तरेन पयसो करून दवरतात, आनी जनतेक तीन पानां करतात. निवडून येवचे आदीं दिल्ली आस्वासनां खुंटयाळ्याक हुमकळटात. तेंवूय देवाचो सोपूत घेवन लेगीत नेगार वतात.
जे लोक देवाक लेगीत मानिनात ते लोक सत्यान वागतले अशें तुमकां दिसता? पयशा खातीर ते कसलेंय सौदे करीत. आयज कोणाचेंच चित्र काडू नजो. मनीसपणाची लागणूक कोणाकूच ना. जंय जंय आमी वावुरतात थंय थंय आमची लागणूक, निश्ठा, तळमळ दिसपाक जाय. आमी फक्त गर्देचो एक भाग जावन उपकार ना. आमी जाग्रृत जावन समाजाच्या हिता खातीर वावरूंक जाय. प्रत्येकाची एक ठाम भुमिका आसपाक जाय. आमी आमच्या कुटुंबाचो एक भाग जावन आसा. आपले बरोबर आपल्या कुटुंबाचो उध्दार करपाक वावरप ही जशी आमची लागणूक, तेच परी सरभोंवतणचो समाजूय आपले कुंटूंब अशें मानूनच जगपाचे आसता म्हणपाचें आमी विसरूंक फावना. सगलेच लोक रडयांनी खेळनात. समाजा भितर सज्जन लोकूय मनीसपणान वावुरतात आनी आपले लागणुकेक प्रामाणीकपणान पाळोय दितात, म्हूण हो समाज चलता. दुश्ट बुध्दीचे वायट लोक आतांच निर्माण जावंक नात, ते आदीं सावन आसात. तेन्ना तांकां राक्षस म्हणटाले. ती राक्षसी वृत्ती आयच्या आपसुवार्थी लोकां मदीं दिश्टी पडटा.
जे बोगस कागदपत्रां तयार करून वा गुड्डुलासांव करून लोकांच्यो जमनी बळकायतात. घरां मोडटात ही गुंडा गर्दी जाली. खरें म्हणल्यार मनशान आपली जीण परिपूर्ण अशीच जगपाक जाय. जिवनाचो खऱ्या अर्थान पुर्णानंद घेवपाक जाय. ते खातीर मनांतले आचार विचार शुध्द जाय. सकारात्मक सोच तुका जैताचे तेंगशेर व्हरून दवरता, आनी नकारात्मक सोच तुका रसातळाक पावयता. हें आमी जाणां जावंक जाय. कांय सुवार्थी लोक पयशे मेळटात म्हूण समाजाच्या हिता आड वचून चुकीच्या मनशांक तेंको दितात. वा तांचे चुकीचें समर्थन करतात हें समा न्हय. मास खावचें पूण हाड गळ्यांत घालून भोंवचें न्हय. हांगा खंय तरी आमी आमची लागणूक
विसरतात.
आयज काल कितें जालां. कश्ट्याक पेज आनी न्हिदतल्याक शीत. जे आपले लागणुकेक पाळो दिनात तांचो थातो मातो करतात. गायकाक थंयच सांडून कोरस गायतल्याक “सिंगर ऑफ द इयर” पुरस्कार भेटोवपी रडी आमचो समाज. केन्ना सुदारतलो?

काशिनाथ नायक
9158345844