भांगरभूंय | प्रतिनिधी
आर्लेकारः आमदाराच्या घरा कडेन थळावे आनी गोवा टॅक्सी वेवसायिकांचें पेटलें
भांगरभूंय । प्रतिनिधी
पेडणें: गोवा मायल्स टॅक्सी वेवसायीक आपले प्रस्न, आपल्यो समस्या मांडचे खातीर पेडणेंचे आमदार प्रवीण आर्लेकार हांच्या घरा कडेन आयिल्ले. त्याच वेळार मोपा आंतरराष्ट्रीय विमानतळार टॅक्सी वेवसाय मेळटले हे आशेन आशिल्ले थळावे टॅक्सी वेवसायीक आर्लेकार हांचे कडेन आपल्यो समस्या मांडपा खातीर गेल्ले. ह्या वेळार गोवा मायल्स टॅक्सी वेवसायिकांनी आपल्यो समस्या मांडटना आमदार आर्लेकार हांणी तांकां थेट सांगलें, आपूण थळाव्या टॅक्सी वेवसायिकां वांगडा आसतलों.
टॅक्सी वेवसाय खंयचेय कंपनीचो आसूं, एकादें भाडें मेळ्ळें जाल्यार तो दर समान आसपाक जाय. पूण कांय गोवा मायल्स टॅक्सी वेवसायीक उण्या दरान भाडें मारतात, असो दावो थळाव्या वेवसायिकांनी केलो. ह्या वेळार दोनूय गटां मदीं बाचाबाची जाली. ते उपरांत थळाव्या आनी गोवा मायल्स टॅक्सी चालकाक येशिश्ट बडयलो. ह्या वेळार कदंबा कर्मचारी थंय हाजीर आशिल्लो. ताकाय थळाव्या टॅक्सी वेवसायिकांनी धारेर धरलो. तूं सरकारी नोकर आसतना तुज्या बायलेच्या नांवार टॅक्सी कशी? तूं कित्याक आयला, अशे प्रस्न टॅक्सी वेवसायिकांनी ताका विचारले.
थळावे टॅक्सी वेवसायीक व्हड संख्येन हाजीर आशिल्ले. गोवा मायल्स टॅक्सी वेवसायिकाक बडयतात हाची दखल घेवन आमदार आर्लेकार मदीं पडले आनी झगडीं सोडोवपाचो यत्न केलो.
मोपा आंतरराष्ट्रीय विमानतळाक लागून आमकां टॅक्सी वेवसाय मेळटलो हे आशेन थळाव्यांनी टॅक्सी वेवसाय सुरू केलो. आमचे प्रस्न अजून मेरेन सुटावे जावंक नात आनी वयल्यान बिगर गोंयकार गोवा टॅक्सी वेवसायीक आमच्या पोटार पांय दवरतात, असो आरोप ह्या वेळार थळाव्या टॅक्सी वेवसायिकांनी केलो. तशेंच तांचो निशेध केलो. विमानतळ सुरू जावन वर्स जालें, पूण अजून लेगीत थळाव्या टॅक्सी वेवसायिकांचे प्रस्न सुटावे जावंक नात. आतां लींक रस्तो मोपा विमानतळार जाता. थंय टोल नाको बसयला. तशेंच तुळसकारवाडीच्यान जो उण्या वेळांत विमानतळार पावपी रस्तो आसा, तो टॅक्सी वेवसायिकां खातीर बंद केला. हाचो निशेध करपाक आनी आपले प्रस्न आमदारा मुखार मांडपाक 11 जुलयाक थळावे टॅक्सी वेवसायीक जमताले. त्याच वेळार गोवा मायल्स टॅक्सी वेवसायीक लेगीत आमदार आर्लेकार हांचे कडेन आपल्यो समस्या घेवन पावले. उलयता उलयता दोनूय गटां मदीं बाचाबाची जाली आनी उपरांत तीं झगड्यार पावलीं.
समान भाडें दर आसचोः प्रवीण आर्लेकार
आपूण सदांच थळाव्या टॅक्सी वेवसायिकां वांगडा आसा. मोपा विमानतळ सुरू जाले उपरांत थळाव्या टॅक्सी वेवसायिकांक प्राधान्य दिवपाचें काम करतां. खूब खेपे मुख्यमंत्री डॉ. प्रमोद सावंत हांचे कडेन थळाव्या टॅक्सी वेवसायिकांचें प्रस्न मांडल्यांत. गोवा मायल्स टॅक्सी वेवसायीक उण्या दरान भाडें मारून थळाव्या टॅक्सी वेवसायिकांचेर अन्याय करतात. हो अन्याय तांणी काबार करचो. तशेंच सगळ्या टॅक्सी वेवसायिकांनी समान दरान भाडें मारचें, असो उलो आमदार प्रवीण आर्लेकार हांणी मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
