भांगरभूंय | प्रतिनिधी
हॉस्पिटेलिटी वेवस्थापन : अंदूं 240 विद्यार्थ्यांक प्रवेश
भांगरभूंय । प्रतिनिधी
पणजी : गोंयांतल्या सगळ्या उद्येगीक प्रशिक्षण संस्थांनी (आयटीआय) अंदूंच्यान हॉस्पिटेलिटी वेवस्थापन अभ्यासक्रम सुरू जातलो. पयल्या वर्सा सगळ्या आयटीआयनी मेळून 240 विद्यार्थ्यांक प्रवेश मेळटलो. अभ्यासक्रम पुराय करपी सगळ्या विद्यार्थ्यांक नोकरेची हमी टाटा समुहान दिल्या.
कारागिरी संचालनालयाचे संचालक एस. एस. गांवकार हांणी ही म्हायती दिली. गोंयांतल्या 10 आयटीआय मदीं हो अभ्यासक्रम सुरू जातलो. प्रवेशा खातीर इत्सूक विद्यार्थ्यांनी अर्ज सादर केल्यात. 20 जुलयाक गुणवत्ता वळेरी जाहीर जातली. 1 ऑगस्टाच्यान वर्ग सुरू जातलें, अशें संचालक एस. एस. गांवकार हांणी सांगलें.
हॉस्पिटेलिटी मळार कांय वर्सांनी 2 लाख रोजगार तयार जातले, अशे संकेत मुख्यमंत्री डॉ. प्रमोद सावंत हांणी दिल्यात. कुशळटाय दिसा निमितान जाल्ले कार्यावळींत ते उलयताले.
हॉस्पिटेलिटी मळार विद्यार्थ्यांनी करियर करपाचो उलो मुख्यमंत्र्यान मारला. हे फाटभुंयेर आयटीआय मदीं अंदूंच्यान हॉस्पिटेलिटी वेवस्थापन अभ्यासक्रम सुरू जाता. हावज किपींग, फ्रंट ऑफीस मॅनेजमेंट, फूड प्रॉडक्शन आनी फूड अॅण्ड बिवरेज हे चार अभ्यासक्रम हॉस्पिटेलिटी मॅनेजमेंट फांट्यांत सुरू जातले. ताज समुहान हो अभ्यासक्रम सुरू करपा खातीर गोंय सरकारा कडेन कबलात केल्या. 6 म्हयन्यांचो अभ्यासक्रम जाले उपरांत 6 म्हयने हॉटेलांत प्रशिक्षण घेवचे पडटलें. ताज समुहान आयटीआयचो दर्जो वाडोवपा खातीर 160 कोटी रूपयांची अर्थीक मजत दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
