भांगरभूंय | प्रतिनिधी
भारत आनी येजमान श्रीलंका हांचे मदीं जुलय आनी ऑगस्ट म्हयन्यांत वन डे आनी टी-20 माळ जातली. हे भोंवडेचें वेळापत्रक काल जाहीर केलें. टी-20 माळेक 26 जुलय सावन सुरवात जातली. जाल्यार वन डे माळ 1 ऑगस्टा सावन खेळयतले. टी-20 माळ पल्लेकल शारांत जातली, जाल्यार वन डे माळेंतल्यो मॅची कोलंबांत जातल्यो. गौतम गंभीराची मुखेल प्रशिक्षक म्हणून ही पयली परिक्षा आसतली.
हे भोंवडे खातीर भारताच्या पंगडाची कांय दिसांनी घोशणा जातली. निवड समिती हे भोंवडे खातीर अणभवी रोहीत शर्मा आनी विराट कोहली तशेंच फास्ट बॉलर जसप्रीत बुमरा हांकां हांकां विसव दिवपाचो विचार करता. मुखेलपद अश्टतासांचो खेळगडो हार्दीक पांड्या सांबाळपाक शकता, जाल्यार वन डे पंगडाचें फुडारपण परतून एकदा लोकेश राहुल सांबाळुये.
भारताचो पंगड 2021त निमाणे खेपे श्रीलंकेचे भोंवडेर गेल्लो. त्या वेळार भारतान वन डे माळ जिखिल्ली. पूण, टी-20 माळेंत 1-2 अशी हार घेवची पडिल्ली.
संवसारीक टी-20 सर्ती उपरांत भारताची ही दुसरी भोंवडी आसतली. सध्या भारताचो पंगड झिम्बाब्वेचे भोंवडेर आसा.
वानिंदू हसरंगान टी-20चें मुखेलपद सोडलें
भारताची भोंवडी सुरू जावचे पयलींच वानिंदू हसरंगान श्रीलंका पंगडाचें मुखेलपद सोडलें. ताका लागून माळ सुरू जावचे पयलीं नव्या मुखेल्याची निवड करची पडटली. तशेंच श्रीलंकेचो पंगड नव्या प्रशिक्षका सयत मैदानांत देंवतलो. अणभवी ओपनर सनथ जयसुर्याक हे माळे खातीर प्रशिक्षक केला.
श्रीलंका पंगडान 1996त संवसारीक वन डे क्रिकेट सर्तीचें वस्तादपण जोडिल्लें, त्या वेळार श्रीलंकेक वस्तादपण मेळोवन दिवपाक जयसुर्याचें म्हत्वाचें योगदान आशिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
