भांगरभूंय | प्रतिनिधी
पणजीः गोंयांतल्या आयटीआयंत टुरिस्ट एम्बॅसेडर अभ्यासक्रम सुरू जातलो. हांतूत विद्यार्थ्यांक फ्रेंच, जर्मन आनी रशियन भाशा शिकयतले अशीं घोशणा मुख्यमंत्री डॉ प्रमोद सावंत हांणी केली. संवसारीक तरणाटे कुशळटाय विकास दिसा निमतान बिरेस्तारा पणजेंत आयोजीत केल्ल्या कार्यावळींत ते उलयताले. ह्या वेळार खात्याचें संचालक एस एस गांवकार, सांख्यिकी संचालक विजय सक्सेना, शिक्षण सचीव प्रसाद लोलयेकार, सदानंद शेट तानावडे आनी हेर अधिकारी हाजीर आशिल्ले.
आमी आयटीआयंत नवे तंत्रगिन्यान, कुशळटाय शिकोवपाचे अभ्यासक्रम सुरू करतात. हांतूत आमी सोलर टेक्नीशियन अभ्यासक्रम सुरू केला. तशेंच आतां टुरिस्ट एम्बॅसेडर अभ्यासक्रम सुरू करतले. राज्यांत येवपी कांय विदेशी पर्यटकांक इंग्लीश समजना. तांकां फकत तांच्योच भाशाच समजतात. अशा पर्यटकां खातीर टुरिस्ट एम्बॅसेडर दुभाशी आनी मार्गदर्शक म्हूण काम करपाक शकतात, अशें मुख्यमंत्र्यान सांगलें.
व्हडल्या हॉटेलांक लेगीत असो मार्गदर्शक जाय आसता. पूण थळावे लोक मेळनाशिल्ल्यान दुभाशी आनी मार्गदर्शक भायल्यान हाडचे पडटात. अशे कांय मार्गदर्शक पर्यटकांक फटोवन पळून वचपाच्यो घडणुको घडल्यात. देखून हें काम भायल्या लोकांक दिवचे परस थळाव्या लोकांक मेळचें ह्या हेतान आमी टुरिस्ट एम्बॅसेडर अभ्यासक्रम सुरू केला. हाका लागून सॉफ्ट स्किल विकसीत करप गरजेचें आसा. विद्यार्थ्यांनी आवड दाखयल्यार हो अभ्यासक्रम येसस्वी जावंक शकता अशें मुख्यमंत्र्यान सांगलें.
—————-
हॉस्पिटॅलिटी मळाचेर 2 लाख नोकऱ्यो
गोंयकारांनी हॉस्पिटल मळाक उण्या दर्जाचें मानूंक फावना. सध्या ह्या मळार फकत 5 टक्के थळावे आसात. फुडल्या पांच वर्सांत हॉस्पिटॅलिटी मळाचेर दोन लाख नोकऱ्यो उपलब्ध जातल्यो. विद्यार्थ्यांनी आपली कुशळटाय वाडोवन ह्या संदीचो लाव घेवचो अशें मुख्यमंत्र्यान सांगलें.
आयटीआय ते आयएसओ प्रमाणपत्र
राज्यांतल्या धा सरकारी आयटीआयंक आयएसओ प्रमाणपत्र मेळ्ळां अशें शिक्षण सचीव प्रसाद लोलयेकार हांणी सांगलें. ही सगळ्या गोंयकारां खातीर अभिमानाची गजाल. हाचे भायर कुशळटाय विकास खात्याक लेगीत आयएसओ प्रमाणपत्र मेळ्ळां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
