भांगरभूंय | प्रतिनिधी
गोंयांतल्या म्हामार्गांचेर कोसळपी पालसणांची गडकरी हांणी घेतली खर दखल
– कोसळिल्ल्या पालसणांची आयज चवकशी
– गोंयांत 25 ते 30 हजार कोटींचीं कामां
– प्रदुशण उणें करपा खातीर जाय मास्टर प्लॅन
– मोपा लींक रोडाचें उक्तावण
भांगरभूंय । प्रतिनिधी
पणजी : राष्ट्रीय म्हामार्गाचेर पालसणां कोसळपी घडणुकांची अधिकाऱ्यां वरवीं आयज शुक्रारा चवकशी जातली. चवकशेंत जे कोण दोशी सिद्द जातात, तांचेर कारवाय जातली, अशें आस्वासन केंद्रीय रस्ते येरादारी आनी म्हामार्ग मंत्री नितीन गडकरी हांणी दिलां. राष्ट्रीय म्हामार्गाच्या कामांत कांय उणाव आसले जाल्यार ते पयस करून सुदारणा करतले, अशें तांणी सांगलें.
केंद्रीय रस्ते येरादारी आनी म्हामार्ग मंत्री नितीन गडकरी हांचे हस्तुकी बिरेस्तारा सांजे मोपा लींक रोडाचें उक्तावण जालें. ह्या वेळार उलयतना नितीन गडकरी हांणी हें आस्वासन दिलें. गोंयांत येता त्या काळांत रस्ते येरादारी आनी म्हामार्ग मंत्रालया वरवीं 25 ते 30 हजार कोटींचीं कामां जातलीं. भौशीक येरादारी खातीर इलॅक्ट्रीक आनी जैव इंधनाचेर चलपी गाडयांचो वापर जावपाक जाय. प्रदुशणाचें प्रमाण उणें करपा खातीर गोंय सरकारान मास्टर प्लॅन तयार करपाचो सल्लो गडकरी हांणी मुख्यमंत्र्यांक दिलो.
कार्यावळीक केंद्रीय मंत्री श्रीपाद नायक, मुख्यमंत्री डॉ. प्रमोद सावंत, येरादारी मंत्री मॉवीन गुदिन्हो, वीज मंत्री सुदिन ढवळीकार, आमदार प्रवीण आर्लेकार, राज्यसभा खासदार सदानंद शेट तानावडे आनी हेर मानेस्त हाजीर आशिल्ले.
मुंबय ते गोंय म्हामार्गाचेर येरादारी चड जाता. येरादारीक लागून प्रदुशण वाडटा. हाचेर उपाय म्हूण 6 हजार कोटी रुपया खर्च करून इस्टर्न बायपास जातलो. इस्टर्न बायपासाचेर येरादारी सुरू जाले उपरांत मुंबय – गोंय म्हामार्गा वयलें प्रदुशण उणें जातलें, असो विस्वास गडकरी हांणी उक्तायलो.
न्हंयबाग, धारगळ आनी पेडें ह्या अपघात जावपी थळांचेर अंडरपास करपाक मान्यताय दिल्या. केंद्रीय मंत्री नितीन गडकरी हांणी गोंयचे उदरगतीन मोलादीक भुमिका वठयल्या. केंद्रीय मंत्री नितीन गडकरी हांकां लागून गोंयांत नेटान रस्ते तशेच म्हामार्गांचीं कामां चालू आसात. दाबोळी आनी मोपा ह्या दोनूय विमानतळांची गोंयाक गरज आसा. दोनूय विमानतळ सुरू उरतले, अशें येरादारी मंत्री मॉवीन गुदिन्हो हांणी सांगलें.
गांवगिऱ्या वाठारांतली कनेक्टिविटी वाडयतले
गांवगिऱ्या वाठारांतली कनेक्टिविटी वाडोपा खातीर रींग रोड उबारपाचो प्रस्ताव आसा. दाबोळी विमानतळ खंयचेच स्थितींत बंद जावचो ना. मोपा विमानतळाचो वापर वाडोपा खातीर विमानतळ रेल्वे स्टेशनाक जोडपाचो प्रस्ताव आसा. मोपा लींक रोडा वयल्यान येरादारी करपी टॅक्सीक टोल फारीक करचोच पडटलो. टॅक्सी चालक आनी पेडणेंच्या लोकांक टोलांत कांय प्रमाणांत सूट दिवपाचें आस्वासन केंद्रीय मंत्री गडकरी हांणी दिलां, अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
