भांगरभूंय | प्रतिनिधी
पणजीः गोंयांत 1 जून ते 11 जुलय ह्या काळांत सरासरी 64.64 इंच पावस पडला. ह्या काळांत वाळपय सगळ्यांत चड 77.30 इंच पावस पडला. हवामान खात्यान 12 आनी 13 तारखेक व्हड पावस पडपाचो अदमास आसा. ते प्रमाण ह्या दोन दिसां खातीर ऑरेंज अलर्ट जारी केला. 14 आनी 15 तारखेक येलो अॅरेज जारी केला.
हाचे आदीं खात्यान आयतारा ऑरेंज अलर्ट जारी करून व्हड प्रमाणांत पावस पडपाची शक्यताय उक्तायिल्ली. पूण आयतारा राज्यांत मध्यम ते विरळ पावस पडलो. राजधानी पणजे दीसभर पावसाचो खेळ चालूच आशिल्लो. पावस उणो जाता तशें तापमान मात्शें वाडत गेलें. आयतारा पणजे चडांत चड तापमान 30.1 डिग्री सेल्सियस आनी उण्यांत उणें तापमान 23.7 डिग्री सेल्सियस नोंद जालां.
राज्यांत चोवीस वरांत सरासरी 1.41 इंच पावस पडला. काणकोण 2.88 इंच, पेडणें 2.18 इंच आनी पणजे 1.83 इंच पावसाची नोंद जाल्या. 1 जून ते 11 जुलय ह्या काळांत वाळपय उपरांत सांखळे 73.66 इंच, सांगें 72.19 इंच, काणकोणां 67.43 इंच, म्हापशें 64.71 इंच आनी पेडण्यां 64.67 इंच पावसाची नोंद जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
