भांगरभूंय | प्रतिनिधी
-सुधाकर कळंगूटकार हांचो संवसार उध्वस्त, मजतीची आस्त
दिवचलः गोंयांत 6 आनी 7 जुलयाक पडिल्ल्या उटंगाराच्या पावसाक लागून जायत्या वाठारांनी हुंवार आयले. जायत्यो लुकसाणीच्यो घडणुको घडल्यो. तातूंत साळ गांयच्या शेजारा आशिल्ल्या दिवचल म्हालांतल्यां लाटंबार्शे पंचायत क्षेत्रांतल्या वडावल-नायकवाडो हांगाच्या सुधारक खेमा कळंगूटकार हांचो संवसार उध्वस्त जाला.
शेतकार सुधाकर कळंगूटकार हांच्यो वट्ट 11 दुभत्यो म्हशी आनी एक रेडो मेळून बारा जनावरां हुंवारांत व्हावन गेल्यो. त्यो रानांत व्हाळाच्या देगे वयल्या झाडांच्या झुडपांनी आडकून पडल्यो. ताका लागून तांकां भायर सरपाक मेळ्ळे ना. हुंवाराचें उदकाची उंचाय वाडत आशिल्ल्यान रातभर ह्या जनावरांच्या तकले वयल्यान हुंवाराचें उदक व्हांवत रावले, ताका लागून तांकां घुस्पटून मरण येवपाक जाय.
हातूंत 11 म्हशी बऱ्या जातीच्यो, 8 गुजर जातीच्यो, दोन पंढरपुरी आनी एक गांवठी मेळून 11 म्हशी जाल्यार एक रेडो हांकां मरण आयलें. ह्यो म्हशी दिसाक 10 लिटर दूद दिताल्यो. ताचेरूच सुधाकर कुटुंबाचो उदरनिर्वाह चलतालो.
हुंवार अायिल्ल्या दिसां सांजे हुंवारांत आडकिल्ल्यान तो परतून आयल्यो नात. शेतकारान राती तांचो सोद घेवपाचो यत्न केलो. पूण त्यो आयल्यो नात. दुसरे ताचो भाव सकाळीं तांचो सोद घेवपाक भायर सरले. तांणी म्हशीचो सोद घेवपाचो यत्न केलो. पूण अजून हुंवाराचें उदक उणें जावंक नाशिल्ले.
तिसरे दिसा आडखळीच्या वाठारांतल्यान घाण वास येता म्हूण ते पळोवपाक गेले तेन्ना म्हशी थंय मरण आयिल्ले स्थितींत दिसून आयल्यो. ताका लागून सुधाकर दुख्ख जाले. कितें करचे हेच तांकां कळना जाले.
हे घडणुकेंत शेतकाराचें अदमासे 7 ते 8 लाख रुपयांचें लुकसाण जालां. तातूंत सध्या कुटुंबाची जोड ना जाल्या. ह्या शेतकारा कडेन आपल्या कुटुंबाचो उदरनिर्वाह करपा खातीर दुसरो मार्ग नाशिल्ल्यान ते हुस्क्यांत आसात. हे घडणुकेचो तलाठ्यान पंचनामो केला. शेतकार सुधारक हांणी विवीध खात्यांत हो पंचनामो सादर केला.
दिवचलचे आमदार डॉ. चंद्रकांत शेटये हांणी फुडाकार घेवन पशु खातें तशेंच मुख्यमंत्री डॉ. प्रमोद सावंत हांची प्रत्यक्ष भेट घेवन हो विशय मांडून शेतकाराक मजत मेळोवन दिवपाचो यत्न करचो, अशी कळंगूटकार कुटुंबियांची मागणी आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
