भांगरभूंय | प्रतिनिधी
न्यायालयाचो आदेश, सेरूला कोमुनिदाद जमीन हडप प्रकरण
म्हापशें, प्रतिनिधी: सेरुला कोमुनिदादची जमीन हडप केल्ल्या प्रकरणांत तेन्नाचे पर्यटनमंत्री दिलीप परूळेंकार आनी हेरांचेर गुन्यांव नोंद करपाचो आदेश सत्र न्यायालयान पर्वरे पुलिसांक दिला. ८ वर्सां आदीं आपणें ही जनहित याचिका दाखल केल्ली. पुलीस चवकशे सयत जमीन हडप केल्ल्या प्रकरणाची पुरायेन चवकशी जावची, अशी मागणी कागाळदार ट्रोजन डिमेलो हांणी केली.
बिरेस्तार ११ जुलयाक आपल्या घरा आयोजीत केल्ले पत्रकार परिशदेंत डिमेलो उलयताले. ह्या जमीन हडप प्रकरणांत हांवें १८ ऑक्टोबर २०१४ दिसा पर्वरे पुलीस स्टेशनाचेर कागाळ केल्ली. तेन्नाचे मंत्री दिलीप परूळेंकार, कोमुनिदादचे ऍटर्नी पीटर मार्टीन्स, प्रमोद परूळेंकार, उत्तर गोंय कोमुनिदाद प्रशासक आयरीन सिक्वेरा आनी सेरूला कोमुनिदादचे पदाधिकारी हांणी सहमतान आनी बेकायदेशीरपणान आपल्या फायद्या खातीर सेरूला कोमुनिदादची जमीन हडप केल्ल्यान तांचे आड भा.दं.सं.चें कलम ११९, १२०, ४१८, १२० ब आनी भ्रश्टाचार प्रतिबंधक कायदो कलम १३(१)(क)(ड) खाला गुन्यांव नोंद करपाची मागणी केल्ली.
पुलिसांनी तशेंच उत्तर गोंय पुलीस अधीक्षकांनी कागाळेची दखल घेवंक नाशिल्ल्यान हांवें म्हापशें पयली श्रेणी न्यायालयांत याचिका दाखल करून पुलिसांक गुन्यांव नोंद करपाचो आदेश दिवपाची मागणी केल्ली. ते प्रमाण न्यायालयान पुलिसांक एफआयआर दाखल करपाचो आदेश दिला.
ह्या आदेशाक पुलिसां वतीन सरकारान सत्र न्यायालयांत आदेश पुनर्विचार याचिका दाखल केली. हे याचिके प्रमाण सत्र न्यायालयान म्हापशें पयली श्रेणी न्यायालयाक हे याचिकेचेर पुनर्सुनावणी घेवपाचे निर्देश दिले. ह्या आदेशा विशीं आमचो पुनर्विचार अर्ज न्यायालयान भायर मारलो. ताचे पयलीं परूळेंकार आनी हेरांनी पयली श्रेणी न्यायालयाच्या आदेशाक उच्च न्यायालयांत आव्हान दिलें.
तशेंच आमचे वतीन अॅड. अभिजीत गोसावी आनी अॅड. दर्शन गोसावी हांणी उच्च न्यायालयांत बाजू मांडली. कनिश्ठ न्यायालयाचो आदेश योग्य काय अयोग्य हो निर्णय सत्र न्यायालयान घेवचो असो आदेश उच्च न्यायालयान दिलो तेन्ना वयल्या ९ जुलय २०२४ दिसा सत्र न्यायालयान उल्लेख केल्ल्या दुबावितांचेर गुन्यांव नोंद करपाचो आदेश पुलिसांक दिला अशी म्हायती डिमेलो हांणी दिली.
पुलीस सामान्य लोकां आड रोखडेच गुन्यांव नोंद करतात. पूण राजकी आनी सत्ताधारी मनशां आड गुन्यांव नोंद करिनात. म्हजे कागाळीक म्हज्या खर यत्नाक लागून ८ वर्सां ८ म्हयने ६ दीस जाले उपरांत न्याय मेळ्ळा. निकाल लागपाक कळाव जालो तरी न्याय मेळटाच आनी कायदो कोणाकूच सोडीनात अशें मत डिमेलो हांणी उक्तायलें.
उच्च न्यायालयांत अवमान याचिका दाखल करतले : ट्रोजन डिमेलो
उच्च न्यायालयान जमीन बेकायदेशीरपणान मेळयल्ल्या प्रकरणांत ती कोमुनिदादीक परत दिवची अशे निर्देश परुळेंकार हांकां पुनर्विचार याचिकेचो निकाल लायतना दिल्ले. ह्या आदेशा आड केल्ली याचिका सर्वोच्च न्यायालयान न्हयकारली. पूण ही सुवात अजून परत मेळूंक ना. उल्लेख केल्ल्या सुवातींचेर अजूनय दुकानां उबीं आसात. ही सुवात आदले वरीं करचे खातीर सरकार कसलीच कारवाय करिना. देखून आमी उच्च न्यायालयांत अवमान याचिका दाखल करतले अशें कागाळदार ट्रोजन डिमेलो हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
