भांगरभूंय | प्रतिनिधी
कॅ. विरियातो फर्नांडीस: म्हादयच्या मुद्द्यार कसलेच तरेची तडजोड नाका
पणजी : म्हादय गोंयकारांचे जिणेंचो एक म्हत्वाचो भाग. ताका लागून हातूंत कसलेच तरेची तडजोड जावपाक जायना. गोंयकार म्हणून गोंयच्या फुडारा खातीर आमच्या हक्का खातीरची ही लढाय. कर्नाटकांत कॉंग्रेसीचें सरकार जरी आसलें तरी कांयच फरक पडना. कॉंग्रेसीच्या नेतृत्वा कडल्यानय तुमी तुमच्या हक्का खातीर लढो दियात असो संदेश दिला. ताका लागून म्हादयच्या मुद्द्यार कसलेच तरेची तडजोड नाका अशें मत दक्षीण गोंय खासदार कॅ. विरियातो फर्नांडीस हांणी उक्तायलें.
दक्षीण गोंय जिल्लोधिकारी कार्यालयांत खासदार फर्नांडीस हांणी लोकांची भेट घेवन समस्या जाणून घेतल्यो. गोंयांत दोन खासदार जाल्यार कर्नाटकांत २८ खासदार आसात, ताका लागून मुख्यमंत्र्यानय ह्या चेंपणा खाला येवचें न्हय. गोंयचें दाजय, गोंयच्या अस्तित्वाचेर कोणेंय घालो घालपाचो यत्न केल्यार ते सोंपतले, अशी शिटकावणी तांणी दिली.
गांवगिर्या वाठारांत रस्ते, मोबायल कनेक्टिव्हीटीचो प्रस्न गंभीर आसा. व्हड कंपन्यो गांवगिर्या वाठारांनी वापरकर्ते नाशिल्ल्यान सैवा दिनात. बीएसएनएला कडेन चर्चा केल्या. टॉवर उभारपा खातीर लोकां कडेन चर्चा करुन मार्ग काडटले. केंद्र सरकारा वरवीं खाजगी टेलिकॉम कंपन्यांक फाटबळ मेळिल्ल्यान बीएसएनएल फाटीं पडिल्ल्याचेंय तांणी म्हणलें.
मिनरल फंडाचो वापर शिक्षणा खातीर करपाची तरतूद आशिल्ल्यान ज्या भुरग्यांचें शिक्षण रस्ते, कनेक्टिव्हिटी नाशिल्ल्यान जायना ताचे खातीर हो निधी वापरपाचेर चर्चा जाली. पिवपाचें उदक, पर्यावरण, भलायकी सुविधा हातुंतल्या गरजेच्या सुविधां खातीर यत्न करतले. भलायकी केंद्र अपग्रेड करपाचे यत्न करतले. गोवा शिपयार्ड, एमपीटींत राज्या भायल्या लोकांक नोकर्यो दितात. हाचे आड ह्या वेवस्थापना कडेन चर्चा करतले. गोंयच्या तरणाट्यां ह्या कंपन्यांनी नोकर्यो मेळोवन दिवपाचो यत्न करतले अशें कॅ. फर्नांडीस हांणी म्हणलें.
एमव्हीआराक ब्लॅकलिस्ट करपाची मागणी
पर्यावरणाची वाट लावन नियोजना बगर गोंयांत उदरगतीचीं कामां केल्यांत. शेतां पुरोवन रस्ते केले, उदक वचपाच्यो वाट पुरयल्यो देखून हुंवाराची परिस्थिती निर्माण जाता. राष्ट्रीय म्हामार्गावेलीं पालसणां कोसळपाच्यो घडणुको हें निश्काळजीपणाचें एक उदाहरण. हें बांदकाम करपी एमव्हीआर कंपनीक ब्लॅकलिस्ट करपाची गरज आसा. लोकांच्या पयशांचो योग्य वापर करूंक ना. केंद्रीय मंत्री नितीन गडकरी राज्यांत येता. तांणी समाजाच्या विवीध घटकां कडेन चर्चा करपाची गरज आसा. फकत एक आमदार कांय शेतकारांक वांगडा घेवन केंद्रीय रस्ते बांधकाम मंत्री गडकरी हांची भेट घेतात, हें दाखोवपा खातीर आसा. फोटो काडपाचो यत्न करिनासतना हाचेर उपाय काडपाची गरज आसा. हे विशीं राजकारण जावपाक जायना. सगळ्यांक मत मांडपाची संद दिवपाची गरज आसा, अशेंय तांणी मुखार म्हणलें.
टॅक्सीचालकांच्या प्रस्नांचेर उपाय काडया
राज्य सरकारान कांय वर्सां आदीं राज्यांत टॅक्सी ऍप हाडलें. तशेंच रेंट अ कार सुरु केली. ताचो परिणाम जावपाक लागलो. पार्किंग खातीरूय जागो उपलब्ध करपाचो प्रस्न निर्माण जालो. थळाव्या टॅक्सीचालकांच्या पोटाचेर हाचो कसलो परिणाम जातलो हाचो विचार जावपाची गरज आशिल्ली. महसूलवाडी सयत व्होटबँक राजकारणाक लागून हें जायत गेलें. कसलेच तरेची दुरदृश्टी नाशिल्ल्यान टॅक्सीचालकांच्या पोटाचो प्रस्न निर्माण जाला. टॅक्सीचालकांचो वेवसाय कायम सुरु उरतलो, हे खातीर संबंदीत घटकां कडेन चर्चा करून योग्य निर्णय घेतले, अशें खासदार कॅ. विरियातो फर्नांडीस हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
