भांगरभूंय | प्रतिनिधी
लियॉनॅल मॅसीच्या फुडारपणाखाला खेळपी अर्जेंटिना पंगडान कोपा अमेरिका हे प्रतिश्ठीत फुटबॉल सर्तीचे फायनलींत सुवात मेळयली. पयले सेमी फायनलींत ताणें कॅनडाच्या पंगडाक 2-0 असो हारयलो.
मॅचीच्या 22व्या मिनटाक ज्युलियन अल्वारेझान गोल करून अर्जेंटिनाचें खातें उगडलें. ते उपरांत लियॉनॅल मॅसीन 51व्या मिनटाक गोल करून अर्जेंटिनाची आघाडी घटमूट केली. अणभवी पंगडा मुखार कॅनडाचें कांयच शाणपण चलूंक ना. ताका एक लेगीत गोल करपाक जमलो ना.
दोनूय पंगड सांखळी फेरयेंत लेगीत एकाट गटांत आशिल्ले. अ गटांत जाल्ले मॅचींत लेगीत अर्जेंटिनान कॅनडा पंगडाक 2-0 असो हारयिल्लो. ते मॅचींत लेगीत ज्युलियन अल्वारेझान गोल केल्लो.
अर्जेंटिनान 2004 सावन आतां मेरेन कोपा अमेरिका सर्तीची किमान सेमी फायनली मेरेन मजल मारल्या. फकत एकदाच ताका निमाण्या आठांत सुवात मेळोवपाक अपेस आयिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.