भांगरभूंय | प्रतिनिधी
झिम्बाब्वे भोंवडेर आशिल्ल्या भारताच्या युवा ब्रिगेडीन तिसरी टी-20 मॅच जिखून पांच मॅचींचे माळेंत 2-1 अशी आघाडी घेतली. भारतान दिल्ले 183 धांवड्यांचे मोखीचो फाटलाव करतना झिम्बाब्वेक अपेस आयलें. ताका निर्धारीत 20 ओव्हरींनी 6 विकेटी व्हगडावन 159 धांवड्यो करप शक्य जाल्यो.
वॉशिंग्टन सुंदराचे उत्कृश्ट बॉलिंगे मुखार भारतान 23 धांवड्यांनी जैत जोडलें. झिम्बाब्वे वतीन डायोग मायर्सान खर झूज दिलें. पूण, ताका हेर बॅट्समनां कडल्यान योग्य अशी साथ मेळ्ळी ना.
भारताच्या आक्रमणा मुखार झिम्बाब्वेच्या एकाय बॅट्समनाक तग धरपाक जमलो ना. एका वेळार तांची स्थिती 5 बाद 39 अशी आशिल्ली. अशा वेळार डायोन मायर्स पंगडाचे मजतीक धांवन आयलो. ताणें आपल्या पंगडा वतीन सगल्यांत चड धांवड्यो करतना 1 सको आनी सात चवक्यांचे मजतीन 49 बॉलांनी नाबाद 65 धांवड्यो केल्यो. ताचे खेरीत क्लायव्ह मदांडे (37) धांवड्यो केल्यो. दोगांयनी सवे विकेटी खातीर 77 धांवड्यांची भागिदारी करून पंगडाक लजेक पडपा पसून वाटायलो. पूण, आपल्या पंगडाक जैत मेळोवन दिवपाक तांकां जमलें ना.
भारता वतीन वॉशिंग्टन सुंदरान तीन, आवेश खानान 2 आनी खलील अहमदान एक विकेट घेतली.
ते आदीं भारतान टॉस जिखून पयलीं बॅटींग करपाचो निर्णय घेतलो आनी 20 ओव्हरींनी 4 विकेटी व्हगडावन 182 धांवड्यो केल्यो. भारता वतीन मुखेली शुभमन गिलान सगल्यांत चड धांवड्यो केल्यो. ताणें तीन सके आनी सात चवक्यांचे मजतीन 49 बॉलांनी 66 धांवड्यो केल्यो. जाल्यार यशस्वी जयस्वालान 36, अभिषेक वर्मान 10, संजू सॅमसनान नाबाद 12 आनी रिंकू सिंगान नाबाद एक धांवडी केली.
ऋतुराज गायकवाडान आक्रमक खेळी करतना 28 बॉलांनी 49 धांवड्यो केल्यो. हातूंत तीन सक्यांचो आनी चार चवक्यांचो आस्पाव आशिल्लो.
झिम्बाब्वे वतीन सिकंदर रझा आनी ब्लेसिंग मुजरबानी हांणी दरेकी 2 विकेटी घेतल्यो. माळेंतली चवथी मॅच 13 जुलयाक जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.