भांगरभूंय | प्रतिनिधी
श्रीपाद नायक: भंडारी सहकारी क्रेडीट सोसायटी वतीन श्रीपाद नायक हांचो भोवमान
पणजी: सहकार मळ समाजाचो आधार म्हूण म्हत्वाची भुमिका वठयता. समाज अदीक घटमूट जावपाचो आसत जाल्यार सहकार मळाचो चडांत चड विस्तार जावप गरजेचें आसा अशें केंद्रीय मंत्री श्रीपाद नायक हांणी म्हणलें.
दी भंडारी सहकारी क्रेडीट सोसायटीचे वतीन पणजेंतल्या सहकार भवन, पाटो हांगा आयोजीत केल्ल्या सत्काराक जाप दितना श्रीपाद नायक उलयताले. उत्तर गोंयच्यान लोकसभेचेर सेगीत सवे फावटी वेंचून आयिल्ले खातीर श्रीपाद नायक हांचो भोवमान केलो.
ह्या वेळार माचयेर शेतकी मंत्री रवी नायक, सांत आंद्रेंचे आमदार विरेश बोरकार, शिक्षण तज्ञ रामराव सूर्या वाघ, सहकार निबंधक अरविंद बुगडे, दी भंडारी सहकारी क्रेडीट सोसायटीचे अध्यक्ष गुरुनाथ स. नायक, जिल्हो पंचायत वांगडी गिरीश उसकयकार, सुशांत मांद्रेंकार बी मानेस्त ह्या वेळार हाजीर आशिल्ले.
सहकारी क्रेडीट सोसायट्यो रीण मेळपाचे सुलभतायेक लागून सामान्य नागरीक, ल्हान उद्देजकांक राष्ट्रीय बँका परस सदांच लागींच्यो दिसतात. समाजाचो मुखेल घटक आशिल्ल्या अशा लोकांच्यो अर्थीक गरजो पुरोवपा खातीर सहकार मळ आनीक व्यापक जावपाची गरज आसा अशें श्रीपद नायक हांणी म्हणलें.
1993 सावन सुरू जाल्ली दी भंडारी सहकारी क्रेडीट सोसायटीची वाटचाल तोखणायेची आसा. सोसायटीच्या समृद्धतायेचो वाडटो आलेख निश्चीतपणान नदरेंत भरपी आसा. खर कश्टाचे परिस्थितीचेर मात करून संस्थेक अर्थीक थिरताय आनी घटाय दिवपी संचालक मंडळाची श्रीपाद नायक हांणी तोखणाय केली.
दी भंडारी सहकारी क्रेडीट सोसायटी अध्यक्ष गुरुनाथ स नायक हांणी केंद्रीय मंत्री श्रीपाद नायक हांकां भेटयिल्ल्या मानपत्राचें वाचन केलें. रवी नायक हांचे हस्तुकीं श्रीपाद नायक हांचो भोवमान केलो.
ह्या वेळार मुखेल उलोवपी ह्या नात्यान हाजीर आशिल्ले रामराव वाघ हांणी हाजीर आशिल्ल्या विद्यार्थ्यांक मार्गदर्शन करतना गतीन बदलत आशिल्ले शिक्षण पद्दतीक आनी तंत्रज्ञानाक सामकार वचपा खातीर तयारी दवरची असो सल्लो दिलो.
सुशांत मांद्रेंकार हांणी कार्यावळीचें सुत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
