भांगरभूंय | प्रतिनिधी
पणजी: कला अकादमीन संगीत शिक्षक, प्रशिक्षक आनी सहाय्यकां खातीर 6 कायम पदां जाहीर केल्यात.
हातूंत भारतीय संगीत आनी नाच शिक्षक संचालक, सतार व्याख्यातो, हार्मोनियम संगीत प्रशिक्षक, कथक स्वर साथीदार आनी कनिश्ठ सांस्कृतीक सहाय्यक ह्या पदां खातीर नोकर भरती कला अकादमीन जाहीर केल्या.
भारतीय संगीत आनी नाच शिक्षक संचालक सर्वसामान्य 1 पद जाहीर जालां. इत्सूक उमेदवार डॉक्टरेट पदवीधर, विद्वान मनीस आसपाक जाय आनी विद्यापीठ, महाविद्यालयांत 10 वर्सां शिकोवपाचो अणभव आसपाक जाय. ना जाल्यार विद्यापीठ, राष्ट्रीय तशेंच डॉक्टरेट पातळेचेर तांणी संसोधन केल्लें आसपाक जाय. ना जाल्यार उमेदवार परंपरीक आनी वेवसायीक कलाकार आसपाक जाय, जो रेडीयो आनी टिव्हीचेर अ दर्जो, तांच्या मळार बरी कामगिरी केल्लो, 12 वर्सांचो अणभव, तशेंच संशोधनाक मार्गदर्शन करपाची तांक, राष्ट्रीय, आंतरराष्ट्रीय परिशद आनी कार्यशाळेंत वांटेकार तशेंच आंतरराष्ट्रीय पुरस्काराचो मानकरी, संस्था आनी प्रशासन वेवस्थापनांत तीन वर्सांचो अणभव ह्या पदा खातीर सक्तीचो आसा.
सर्वसामान्य श्रेणींत सितार वादनांत व्याख्यात्या खातीर 1 पद जाहीर जालां. ह्या पदा खातीर पदव्युत्तर शिक्षणा सयत बरो शिक्षणीक रॅकोर्ड ना जाल्यार ह्या संबंदांतली राष्ट्रीय वा देशा भायल्या विद्यापिठांतल्यान पदवीधर आसपाक जाय. ना जाल्यार इत्सूक उमेदवार परंपरीक आनी वेवसायीक कलाकार आसपाक जाय, जाणें म्हालगडे परंपरीक कलाकारां कडल्यान शिक्षण घेतलां, रेडियो आनी टीव्हीचेर अ दर्जाचो कलाकार, हो विशय खोलायेन शिकोवपाची तांक ह्या पदा खातीर सक्तीची आसा.
हार्मोनियम संगितांत प्रशिक्षका खातीर दोन पदां जाहीर जाल्यात. एक ओबीसी तर दुसरे अनारक्षीत. ह्या पदां खातीर संगितांत पदवी, ना जाल्यार गंधर्व महाविद्यालयांतल्यान विशारद पदवी, ना जाल्यार कला अकादमींतल्यान संगीत परांगत वा संगीत कुशल, ना जाल्यार तीन वर्सांचो अणभव सक्तीचो आसा.
कथकांत स्वर साथिदारां खातीर एक पद एसटी खातीर राखीव आसा. ह्या पदा खातीर ह्या विशयांत पदवी, ना जाल्यार गंधर्व महाविद्यालयांतल्यान संगीत विशारद, ना जाल्यार कला अकादमींतल्यान संगीत कुशल, ना जाल्यार ह्या मळार बरी कामगिरी केल्लो परंपरीक वा वेवसायीक कलाकार आसपाक जाय आनी ऑल इंडिया रेडियो कडल्यान ताका मान्यताय आसप सक्तीचें आसा.
सर्वसामान्य श्रेणींत कनिश्ठ सांस्कृतीक सहाय्यकाचें एक पद जाहीर जालां. ह्या पदां खातीर उच्च माध्यमीक प्रमाणपत्र वा अधिकृत संस्थे कडल्यान शिक्षणीक पात्रताय, कंम्प्युटराचें गिन्यान आनी तीन वर्सां कला आनी संस्कृती मळाचेर काम करपाचो अणभव आसप सक्तीचें आसा. सगळ्या इत्सूक उमेदवारांक कोंकणी भास आनी 15 वर्सांचें राबितो प्रमाणपत्रूय सक्तीचें केलां. मराठीचें गिन्यान आसप बरें. 45 वर्सां पिरायेची मर्यादा आसा. ह्या पदां खातीर अर्ज कला अकादमी आनी पोरणें सचिवालयांत मेळटले आनी ते भरून 18 जुलया पयलीं कला अकादमींत दिवचे, अशें कळींत केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
