… आनी राहुल द्रविडान अतिरिक्त बोनस न्हयकारलो

भांगरभूंय | प्रतिनिधी

नवी दिल्ली, खबरां संस्था : टी- 20 क्रिकेट वर्ल्ड कपांत जैत मेळयले उपरांत भारतीय क्रिकेट मंडळान (बीसीसीआय) दिल्लो पांच कोटींतलो 2.5 कोटी रुपयांचो बोनस न्हयकारिल्ल्यान मुखेल प्रशिक्षक राहुल द्रविडाची नमळाय परत एक फावट सगल्यांक दिसली. पंगडाच्या आदार कर्मचारी विभागाच्या सगळ्या वांगड्यांक समान बोनस मेळचो हे खातीर द्रवीडान हें पावल उखल्लां. द्रवीडाच्या जाग्यार आतां भाजपाचे आदले खासदार आनी आदले क्रिकेटर गौतम गंभीर मुखेल प्रशिक्षक जाल्यात.
बीसीसीआयन खेळगडे आनी आदार कर्मचाऱ्यां सयत टीम इंडिया वांगड्यांक 125 कोटी रुपयांचें इनामां जाहीर केल्लें. खेळगड्यांक आनी राहुल द्रवीडाक 5- 5 कोटी रुपया बोनस मेळ्ळो. मात, सपोर्टिंग स्टाफ विभागाचे बॅटींग प्रशिक्षक विक्रम राठोड, बाॅलिंग प्रशिक्षक पारस म्हांबरे, फिल्डिंग प्रशिक्षक टी दिलीप हांकां बोनस म्हणून 2.5 कोटी रुपया मेळपाचे आशिल्ले. हें कळटकच आपूणय बोनस म्हणून फकत 2.5 कोटी रुपया घेतलों अशें राहुल द्रविडान मंडळाक सांगलें, अशी म्हायती एका सूत्रान दिली.
ह्या पंगडाचो भाग आशिल्ल्या 15 खेळगड्यांक दरेकीं पांच कोटी रुपया मेळ्ळे. सपोर्ट स्टाफ वांगड्यांक 2.5 कोटी रुपया मेळ्ळे जाल्यार निवड करप्यांक आनी ट्रॅव्हलिंग रिझर्व्हांक दरेकी 1 कोटी रुपया बोनस इनामां मेळ्ळीं. बीसीसीआयचे सचीव जय अमित शाह आनी अध्यक्ष राॅजर बिन्नी हांणी आयतारा 4 जुलयाक मुंबयंत जैतिवंत परेड जाले उपरांत इनामाचे पयशे पंगडाक दिले.

पयलेच खेप न्हय
राहुल द्रविडाची ही कृती पयलेच खेप न्हय, तर हाचे आदीं 2018 वर्सा भारतान अंडर 19 वर्ल्ड कप जिखले उपरांत बीसीसीआयन तेन्नाचो प्रशिक्षक द्रविडाक 50 लाख रुपया, ताच्या विभागाच्या हेर वांगड्यांक 20 लाख रुपया आनी खेळगड्यांक 30- 30 लाख रुपया इनाम दिवपाची घोशणा केली. द्रविडान भारतीय क्रिकेट मंडळाक इनामाचे पयशे प्रशिक्षक विभागाच्या कर्मचाऱ्यां मदीं समान वांटून घेवपाक सांगिल्लें आनी मंडळान ताची विनवणी मान्य केली.