भांगरभूंय | प्रतिनिधी
नवी दिल्ली, खबरां संस्था : उत्तर प्रदेशांत सोमारा सावन पडपी उटंगाराच्या पावसाक लागून वेगवेगळ्या अपघातांनी १० जाणांक मरण आयलां. गंगा, राप्ती आनी शारदा न्हंयो वेगवेगळ्या सुवातांचेर धोक्याचो पांवडो हुपून व्हांवतात अशी म्हायती अधिकार्यांनी दिली.
देशभरांत पावसाचेर सांवार आयिल्ल्यान लोकजीण विस्कळ्ळ्या. आसामाक व्हडा प्रमाणांत हुंवाराचो धपको बसला. तशेंच मंगळारा वीज कोळिल्ल्यान तिगांक मरण आयलें. जाल्यार उत्तराखंडांत फाटल्या २४ वरांनी पडिल्ल्या घोग्यांनी पावसाक लागून तिगा जाणांक मरण आयलें.
राजधानी दिल्लींत व्हड पावसाक लागून जायत्या सुवातांचेर हुंवार आयलो. येरादारींतूय आडमेळीं आयलीं. जायत्या सुवातींनी वाहनांच्यो लांबचे लांब रांको आशिल्ल्यान प्रवाशांक बरेच त्रास सोंसचे पडले.
राजस्थानाक सगळेच कडेन पावस पडिल्ल्यान जयपूर आनी सवाई माधोपूर हांगा २४ वरांनी सगळ्यांत चड पावस पडलो. जाल्यार हेर कडेन पावस शिरशिरून गेलो.
पश्चिम बंगालच्या उत्तर भागांत फाटल्या कांय दिसां सावन पवस नेटान झडटा. ११ जुलय मेरेन हांगा पावसाचो नेट चालूच उरपाचो अदमास हवामान खात्यान उक्तायला. कर्नाटकाच्या उडुपी जिल्ह्यांत मंगळारा उटंगराच्या पावसाक लागून लोकजीण विस्कळीत जाली. उडुपी पुत्तुर हांगा राष्ट्रीय महामार्ग ६६चो कांय भाग उदका पोंदा गेलो. दक्षिण कन्नड जिल्ह्यांत ‘रेड अलर्ट’ जारी केल्ल्यान शाळो आनी महाविद्यालयां बंद दवरल्यांत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
