भांगरभूंय | प्रतिनिधी
उनाव, खबरां संस्था : उत्तर प्रदेशांतल्या उन्नाव जिल्ल्यांतल्या लखनौ- आग्रा एक्सप्रेस रस्त्यार बसीन दुदाच्या टँकराक धपको दिलो. ह्या भिरांकूळ अपघातांत बशींतल्या 18 जाणांक मरण आयलें जाल्यार सुमार 20 जाण जखमी जाल्यात. मरण आयिल्ल्यां मदीं 14 बायलो, 3 दादले आनी एक ल्हान भुरगो आसा.
मेळिल्ले म्हायती प्रमाण ही बस बिहारांतल्या सीतामढी सावन दिल्लींक वताली. सकाळीं 5:15 वरांचे सुमाराक बिहार सावन दिल्लींक वचपी बसीचो दुदाच्या टँकराक नेटान धपको बसलो. हांतूत 18 जाणांक मरण आयलें. जखमींक भायर काडून उपचारा खातीर हॉस्पिटलांत दाखल केले. पुलिसांनी गरजेची कारवाय सुरू आसा. बस खूब वेगान वताली. ड्रायव्हराचो बसी वयलो ताबो गेलो आनी तिणें टँकराक धपको दिलो अशें मुळाव्या तपासांत दिसून आयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
