भांगरभूंय | प्रतिनिधी
त्रिपुरा, खबरां संस्था: एच.आय.वी हें एक धोक्याचें व्हायरस जाका लागून एड्स जावंक शकता. हो रोग पयलीं आंग दुबळें करता. उपरांत ल्हान- ल्हान दुयेंसां जिव घेवपी थारतात. आतां त्रिपुराच्यान एक धक्को दिवपी खबर मुखार आयल्या. हांगा ८०० परस चड विद्यार्थ्यांमदीं एचआयव्ही विषाणू सांपडल्यात. आतां मेरेन ५७२ भुरगीं जिवीं आसात जाल्यार ४७ जाणांक मरण आयलां. उरिल्ले फुडल्या शिक्षणा खातीर राज्या भायर गेल्यात. त्रिपुरा स्टेट एड्स कंट्रोल सोसायटीच्या वरिश्ठ अधिकार्यान ही म्हायती दिल्या.
बुरशें काम करपी गिरेस्त भुरगीं
संसर्ग जाल्ल्या विद्यार्थ्यांची ही आंकडेवारी २२० शाळा, २४ म्हाविद्यालयां आनी विद्यापिठांतल्यान आयल्या. म्हत्वाचें म्हणल्यार हातूंतले चडशे भुरगे गिरेस्त कुटुंबांतले आसात.
एच.आय.वी.च्या संक्रमणाचें एक व्हड कारण म्हळ्यार सुयो वांटून घेवप. एच.आय.वी हो जिवाक धोको निर्माण करपी रोग. जो संसर्गजन्य सुयांचो वापर करतकच व्हड प्रमाणांत पातळटा. ही स्थिती चड करून शिरेंतल्यान ड्रग्सांचो वा हेर वखदांचो दुरुपेग जाल्ल्यान जाता. एकूच सूय जायत्या जाणांच्या संपर्कांत येता. संवसारीक भलायकी संघटनेच्या म्हणण्या प्रमाण एच.आय.वी.चो व्हायरस कुडीच्या द्रवांत आसता. दुसर्या मनशाच्या रगताच्या संपर्कांत आयल्यार तो पातळटा. हो रोग रगत, आवयचें दूद, विर्या वरवीं पातळटा.
एड्स हो एच.आय.वी.चो निमाणो पांवडो
एच.आय.वी.च्या संसर्गाच्या निमाण्या पांवड्याक एड्स म्हण्टात. हातूंत दुयेंतीची रोगप्रतिकार शक्त दुबळी जाता. उपरांत ताका हेर रोग लागू जातात. ताका लागून उपरांत ते व्यक्तीक मरण येता.
एच.आय.वी.चीं सुरवातेचीं लक्षणां
ह्या व्हायरसाचें पयलें लक्षण म्हळ्यार फ्लू. जोर येवप, थंडी येवप, फोड येवप, न्हिदेच्या वेळार घाम येवप, स्नायूंक दुखप, गळो दुखप, थकप, लिम्फ नोड्स सुजप, तोंडांत फोट येवप हीं लक्षणां दिसतात. संसर्ग जाले उपरांत २ ते ४ सप्तकां भितर हीं लक्षणां दिसतात.
एच.आय.वी.चेर उपचार
डब्ल्यूएचओच्या म्हणण्या प्रमाण अजून एच.आय.वी. अँटीरेट्रोव्हायरल वखदां हो व्हायरस पातळपाक आडायतात. सुरक्षीत संभोग, एच.आय.वी.ची चांचणी, नव्यो सुयो वापरप अशा उपायांनी तुमी स्वताची राखण करूंक शकतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
