भांगरभूंय | प्रतिनिधी
भारत आनी दक्षीण आफ्रिका बायलांच्या पंगडां मदीं चालू आशिल्ली टी-20 माळ 1-1 अशी बादाबाद उरली. हांगाच्या एम ए चिंदबरम स्टेडियमाचेर जाल्ली मॅच भारतान 10 विकेटींनी जिखली.
दक्षीण आफ्रिकेचो डाव 17.1 ओव्हरींनी फकत 84 धांवड्यांचेर सोंपयलो. ते उपरांत भारतान 10.5 ओव्हरींनी बिनबाद 88 धांवड्यो करून जैत जोडलें. ओपनर स्मृती मंधानान 40 बॉलांनी नाबाद 54 धांवड्यो केल्यो. ताणें सको मारून आपलो अर्द शेंकडो पुर्ण केलो आनी भारताचें जैतूय निश्चीत केलें.
माळेंतली पयली मॅच दक्षीण आफ्रिकेन 12 धांवड्यांनी जिखिल्ली. दुसरी मॅच पावसाक लागून रद्द करची पडिल्ली. ताका लागून माळ बरोबरींत सोडोवपाक भारताक तिसरी मॅच जिखपाकूच जाय आशिल्ली. भारतान बॅटींग आनी बॉलींग दोनूय विभागांनी जबरदस्त प्रदर्शन केलें.
दक्षीण आफ्रिकेची सुरवात सामकी बाबत जाली. मुखेली लॉरा वोल्वार्ड्ट 9 धांवड्यो करून तंबूंत परतली. तिका श्रेयांका पाटीलान बाद केली. पांचवे ओव्हरींत मारीजॅन कप्प बाद जाली. मजगतीं, ताजमीन ब्रिट्सान 20 आनी एनेके बॉशान 14 बॉलांनी 17 धांवड्यो केल्यो. ते उपरांत दक्षीण आफ्रिकेचो डाव गडगडलो.
भारता वतीन पुजा वस्त्रकरान 13 धांवड्यो दिवन 3 विकेटी घेतल्यो. राधा यादवान 3 ओव्हरींनी फकत 6 धांवड्यो दिवन 3 विकेटी मेळयल्यो.
मोखीचो फाटलाव करपी भारतान जबरदस्त सुरवात केली. स्मृती मंधाना आनी शेफाली वर्मा हांणी सहज बॅटींग केली. शेफालीन 25 बॉलांनी तीन चवक्यांचे मजतीन 27 धांवड्यो केल्यो.
प्लेयर ऑफ दी सिरिजा खातीर पुजा वस्त्रकराची निवड जाली. आमी नॅटांत जे तरेचो सराव केल्लो, ताची अंमलबजावणी योग्य रितीन मैदानांत केली. आपूण विकेट टू विकेट बॉलींग करपाक सोदताली असें पुजान पत्रकारां कडेन उलयतना सांगलें.
ज्या गजालींनी सुदारणां करपाची गरज आशिल्ली, तातूंत योग्य रितीन सुदारणां केली आनी ताचो आमकां फायदो जालो. फुडारांत आमकां खर आव्हानांक तोंड दिवपाचें पडुये. ते खातीर आमी तयारी केल्या. आयज आमी सकारात्मक आशिल्लीं आनी सांघीक रितीन खेळ केलो अशें भारताची मुखेली हरमनप्रीत कौरान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
