थिये घरांनी घुसलें उदक; लोकांची धांदळ
भांगरभूंय | प्रतिनिधी
म्हापशेंः गोंयांत फाटल्या तीन दिसां सावन उटंगाराचो पावस पडप चालूच आसा. पावसाच्या उदकाक लागून बार्देस म्हालांतल्या सकयल्या वाठारांतल्या कांय घरांनी उदक घुसपाचो प्रकार घडलो. पायनीवाडो-थिये न्हंयचेदेगे वेल्या आठ ते 10 घरांनी उदक गेल्ल्यान लोकांची धांदळ जाली.
आयतारा सावन सुरू आशिल्ल्या पावसाक लागून पायनीवाडो-थिये वाठारांतल्या कांय घरांनी व्हड प्रमाणांत उदक घुसलें. ताका लागून लोकांची धांदळ जाली. घडणुकेची म्हायती मेळटकच सरपंच व्यंकटेश शिरोडकार आनी थळावे पंच वांगडी मायकल फर्नांडीस हांणी घडणूक थळाक भेट दिवन पळोवणी केली.
ह्या घरांचे फाटले वटेन मानस आसा. तशेंच नाल्याचेर पायपांचो सांकव बांदला. हो सांकव कोयराक लागून तुंबलो तशेंच मानशे वेलो कोयर सांचलो. हें निचरा जावंक नाशिल्लें उदक लोकांच्या घरांनी घुसलें. ही मानस आपचलीत आसा. ताका लागून ती आपले आपूण उगडटा आनी बंद जाता.
मजगतीं, करासवाडो म्हापशें जंक्शना वेल्या उड्डाण पुलाक गळटी लागल्या. दोन स्पॅनाचे जोडणेंतल्यान उदक सकयल झिरपता. हाका लागून कामाच्या दर्ज्या विशीं प्रस्न उपस्थीत जायत आसा.
करासवाडो जंक्शना सयत म्हापशें आनी बार्देस म्हालांतले चडशे भितरले रस्ते आनी म्हामार्गा वेल्या सर्व्हीस रस्त्यांची चाळण जाल्या. भुंयगत वीज वाहिनीच्या खणपाच्या कामा उपरांत योग्य प्रकारान रस्ते पुरोवंक नाशिल्ल्यान म्हालांतल्या सगल्या रस्त्यांचेर व्हड व्हड फोंडकुलां पडल्यांत. म्हापशेंच्या गांवसवाडो आनी कुचेली आनी हेर वाठारांतल्या रस्त्यांची चाळण जाल्या. मार्ना शिवोली, पर्वरे चोघम रस्त्यारूय व्हड व्हड फोंडकुलां पडिल्ल्यान वाहनचालकांक मनस्ताप सोंसचो पडटा.
मजगतीं, मंगळारा बार्देसचे उपजिल्होधिकारी कबीर शिरगांवकार हांणी आपत्कालीन वेवस्थापना खाला प्रशासकी अधिकाऱ्यांची बसका घेतली. ह्या वेळार उपजिल्होधिकारी पांडुरंग गाड, गटविकास अधिकारी मनोहर परवार, उजो पालोवपी दळाचे अधिकारी गणेश गोवेकार आनी हेर अधिकारी हाजीर आशिल्ले. पावसाचो नेट वाडिल्ल्याचे फाटभुंयेर सगल्या प्रशासकी खात्यां सयत नियाळ बसका घेतली. सगल्यांक गरजेच्यो सुचोवण्यो दिल्यात आनी थिये हुंवाराचे परिस्थिती विशीं उदका स्रोत खात्या कडल्यान अहवाल मागयला. पावसाचें उदक सांचले उपरांत मानस वा बांद कुशीक काडप हो ताचेर उपाय नासून अहवाला उपरांत उपाय काडटले अशी म्हायती कबीर शिरगांवकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
