भांगरभूंय | प्रतिनिधी
‘म्हादय’चेर प्रवाह समितीक सगळ्यांनी सहकार्य करुंक जाय
पणजी, प्रतिनिधी : प्रवाह समितीन म्हादय न्हंयेच्या पात्राची पळोवणी केल्ल्यान कर्नाटकाच्या पोटांत दुखपाक लागलां. म्हजो फोटो लासपा सयत प्रवाहाक कर्नाटकांत विरोध जालो. हाचो अर्थ गोंयचे यत्न योग्य दिशेन सुरू आसा, अशें मुख्यमंत्री डॉ. प्रमोद सावंत हांणी सांगलें.
विधानसभेच्या कामकाज सल्लागार समितीच्या (बीएसी) बसके उपरांत उलयताना मुख्यमंत्र्यांनी ही म्हायती दिली. म्हादय संबंदी नेमिल्ल्या प्रवाह समितीन म्हादय पात्राची पळोवणी केली. ती पावसांत जावप ही सामकी बरी गजाल. पळोवणे उपरांत प्रवाह समिती केंद्र तशेच सर्वोच्च न्यायालयाक अहवाल सादर करतली. ह्या अहवालांतल्यान कर्नाटकाचें पितळ उक्ते पडटलें, अशें डॉ. सावंत हांणी सांगलें.
प्रवाह समिती कडल्यान म्हादय पात्राची पळोवणी जाल्या ताचो गोंयांक कसलोच लाव जावचो ना. पावसांत पळोवणी जाल्ल्यान कर्नाटकान जे उदक घुंवडायलां तें दिसचें ना, असो आरोप आमदार विजय सरदेसाय हांणी केला. प्रवाह समिती ही स्वतंत्र समिती आसा. हाका लागून प्रवाह समितीच्या पळोवणेक सगळ्यांनी सहकार्य करपाक जाय. म्हादय वाटावपा खातीर सगळ्यांनी एकठांय येवपाची गरज आसा, अशें डॉ. सावंत हांणी म्हणलां.
शेतकारांक लुकसाण भरपाय मेळटली
पावसाक लागून राज्यांत बरीच हानी जाल्या. शेत तशेच बागायतीच्या लुकसाणेची भरपाय शेतकारांक मेळटली, अशें डॉ. सावंत हांणी ह्या वेळार सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
