भांगरभूंय | प्रतिनिधी
म्हापशें, प्रतिनिधी ः माडेल, थियेच्या बाल घरांतल्या दोगी नेण्ट्या चलयांच्या अपहरण प्रकरणांत कोलवाळ पुलिसांनी दोन तरणाट्यांक अटक केली.
अरबाझ हयात खान (२०, रा. कुंभारवाडो, शेळपें- धुळेर) आनी सबिर रहात अली बेतगेरी (रा. व्हडलें भाट, ताळगांव) अशीं दुबावितांचीं नांवां आसात. तशेंच पुलिसांनी अपहरणा खातीर वापरिल्ली जीए ०९ ए ३६१९ क्रमांकाची हुंडाय आय टेन गाडीय जप्त केल्या.
ही अपहरणाची घडणूक फाटल्या ५ जुनाक रातची घडिल्ली. ह्या प्रकरणाची बाल घराची ऍनी कुंचेराकट्ट हिणें कोलवाळ पुलिशेंत कागाळ केल्ली. पुलिसांनी रोखडीच कारवाय केली. म्हापशें पुलिसांचे मजतीन मरड म्हापशेंच्या एसआर बिल्डींगेंतल्यान दोनूय १३ आनी १४ वर्सां पिरायेच्या नेण्ट्या चलयांची सुटका केली.
बाल कल्याण समितीच्या आदेशा प्रमाण काळजी आनी संरक्षणा खातीर ह्या नेण्ट्या चलयांक बाल घरांत दवरिल्लें. शुक्रारा ५ तारखेर चलयो गायब आशिल्ल्याचें कागाळदाराच्या लक्षांत आयलें. उपरांत तांणी बेगोबेग पुलिशेंत कागाळ दिली. १२ वरां भितर शेनवारा सकाळीं म्हापशें पुलिसांचे मजतीन मरड म्हापशेंच्यान दोनूय चलयांची सुटका केली. ह्या दोगांय चलयांक अपना घरांत धाडल्यांत.
पिडेस्त चलयांचे जबानीच्या आदारार पुलिसांनी वयल्या दोनूय दुबावितांक सोमार ८ जुलयाक सांजेवेळार अटक केली. फुडलो तपास पुलीस निरीक्षक विजय राणे हांच्या मार्गदर्शना खाला पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
