भांगरभूंय | प्रतिनिधी
शेनवार, आयतार बायलेक थोडो सुशेग मेळचो म्हणून हांव च्या करपाचें थारायतां. दूद बारीक गॅसार तापत दवरचें पडटा, अशें हांव आयकुन जाणा आशिल्लों. पूण काम बेगीन- बेगीन सोंपोवपाक जाय आनी च्या बेगीन फुर- फुरावपाक जाय, म्हणून हांव दूद दवरिल्लो गॅस मोठो करतां…..एका मिनटांत तें तापचें म्हणून….
म्हजे बायलेन केल्ले च्या परस बरो च्या म्हजो जातलो हो आत्मविस्वास म्हाका आसलोच. इतल्यान साकर सोंपल्या हें म्हज्या लक्षांत येता आनी साकरेचो व्हडलो डबो हांव सोदपाक लागतां….. तो सोदी मेरेन आनीक चार- पाच डबे “घालीन लोटांगण, वंदिन चरण” म्हणत आवाज करत सकयल पडटात. जमनीर पडिल्ले डबे हांव एकठांय करीसर गॅसार दवरिल्लें दूद ऊतून ओतून वता…
बायल अयस- पयस ना तें पळोवन कपड्याच्या फाड्यान गॅसार सांडिल्लें दूद पुसुन काडटा आनी दूद ओतिल्ल्याचे सगळे पुरावे काब्बार करुन उडयतां….
तो मेरेन कडक च्या तयार जाल्लो आसता. तो गाळून, एक कप बायले खातीर मेजार दवरतां…. आनी रांदचे कुडींत कांय जावकुंच ना अशें भासोवन आनी बाबडेशें तोंड करुन, बेट्योच बाकीच्यो खबरो करीत हांव भायर सालांत येवन पांयार पांय उडोवन, फाती बिस्कुती च्यांत बुडयता थंय आसा…………….. इतल्यान…
“मेल्ल्या, xxxx, xxx पांच मिनटांत किचनाची दशा करुन उडयली मरे तुंवें?? ल्हान भुरगो परवडलो. हरशी म्हणुन तुका तकली देवान धोपरांकच दिल्या…तुजी कांयच चुक ना.”
उतरां कानांर पडटकच, बिस्कूत च्यावेच्या कपांत बुडली. म्हजी दशा घणसाबैला सारकी जाल्ली आनी तिचो तोंडाचो रणगाडो उज्जो भायर ओकतालो…
“हांव म्हणुन तुज्या वांगडा दीस काडटां… वावराडी कशी…. म्हजे मम्मी, डॅडीन तुज्या सारके पन्नास जाण आमगेर कामांक दवरल्यात…. आनी तुका ती फुकट पसून कामांक दवरपा ना. लग्नांत गळ्यांत माळ पडटना, हांवें कोणाचें तोंड पळयिल्लें देव जाणा.”
किचन आनी हाॅलाच्या मदल्या दारार येवन तिची फायरींग चालू आशिल्ली आनी सगळ्यो गुळयो म्हजेच वाटेन ता..ड, ता..ड करुन फुट्टाल्यो…
“मौनम सर्वार्थ साधनम”… थोडो वेळ वग्गी रावतकुच म्हाका कळ्ळें की हांवें शेगडी पुशिल्ली, पूण गॅसा पोंदां ओतिल्लें दूद हांव पुसपाक विसरिल्लों आनी ताकाच लागून म्हजी भानगड दुदा वांगडाच भायर ओतली…. आनी सांगपाचें म्हळ्यार तो फाडोय हांवें धुवुन दवरुंक नाशिल्लो आनी मुंयांनी ओट्यार आनी फाड्यार गर्दी केल्ली…. आमगेलेक झगडपाक आयतोच पुरावो मेळ्ळो….
एक मात, दर एक फावटी हांव कितें ना कितें भानगड करतां आनी कितें ना कितें पुरावो फाटल्यान सोडटाच. मागीर गॅरेंटेड फोंडांत पडटा….नशिबाचो भोग तो….
शेवटी बायलो त्यो बायलो… तुमका “फोंड्याचे” बसीर कशें आनी केन्ना बसोवप, हें तांकां जुस्त खबर आसता…..
घेर्र सोंपतकुच हांव च्या पिवपाक गेलों…. पुण दाट दुदाची केल्ली ती च्या थंणेल्ली आनी दूद घालुनय ती फुटी च्या लागपाक लागली.
एकनाथ सामंत
9226219723
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
