भांगरभूंय | प्रतिनिधी
तुर्किये पंगड एका गोलाचे आघाडी सयत युरो करंड फुटबॉल सर्तीचे क्वॉर्टरफायनल लडतींत धपको दिवपी निकालाचे दिकेन वता आसतना नॅदरलॅण्डान दुसऱ्या अर्दांत स मिनटां भितर दोन गोल केले. ह्या नेटार नॅदरलॅण्डान 20 वर्सांनी सेमी फायनलींत सुवात मेळयली. ताणें 2-1 अशा फरकान जैत जोडलें.
सामेत अकायदीन हाच्या भेदक हेडराक लागून तुर्किये पंगडाक 35व्या मिनटाक आघाडी घेवप शक्य जालें. ते उपरांतच्या 35 मिनटां मेरेन व्हिन्सेन्झो मॉंटेला हाच्या मार्गदर्शनाखाला खेळपी तुर्किये पंगडान आपलो शेक दवरलो. मॅचीच्या 70व्या मिनटाक डिफॅण्डर स्टेफन दुव्राय हाणें हेडरा वरवीं गोल करून नॅदरलॅण्डाक बरोबरींत हाडलो.
मेम्फिस डिपायाच्या क्रॉसाचेर स्टेफनान प्रतिस्पर्धी गोलकीपराक बॉल आडावपाची संद दिली ना. 76व्या मिनटाक नॅदरलॅण्डाचो कॉडी गॅक्पो आनी तुर्कियेचो मेर्त मुल्डूर हांणी गोलपोस्टा लागसार बॉलाचेर ताबो मेळोवपाचो चुरस जाली. ह्या यत्नांत मुल्डूरान आत्मघातकी गोल केल्ल्यान नॅदरलॅण्डाक म्हत्वाची आघाडी फावो जाली. ती निर्धारीत 90 मिनटां उपरांत निर्णायक थारली. भरपाय वेळाच्या अखेरच्या मिनटाक तुर्कियेचो मैदाना भायलो खेळगडो बेर्तू यिलड्रीमाक वायट वागणुकेक लागून रॅड कार्ड दाखयलें.
1988ची युरो करंड सर्त जिखपी नॅदरलॅण्डान 2004 उपरांत पयलेच खेपे सेमी फायनलींत सुवात मेळयली. तीन वर्सां पयलीं ताचें आव्हान प्री-क्वॉर्टरफायनलींत सोंपिल्लें. युरो करंड सर्तीचे सेमी फानयलींत सुवात मेळोवपाची ताची ही वट्ट सवी खेप.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
