भांगरभूंय | प्रतिनिधी
संवसारीक टी-20 क्रिकेट सर्त जिखपी भारताच्या पंगडांतले वरिश्ठ खेळगडे जशे मुखेली रोहीत शर्मा, विराट कोहली आनी फास्ट बॉलर जसप्रीत बुमरा हांकां श्रीलंकेचे भोंवडे खातीर विसव दिवपाची शक्यताय आसा. 27 जुलय सावन सुरू जावपी श्रीलंका भोंवडे खातीर झिम्बाब्वे आड सध्या खेळपी पंगडा भशेन युवा पंगड वचुये.
वरिश्ठ खेळगड्यांक विसव दिवपा विशीं भारतीय क्रिकेट नियामक मंडळाची (बीसीसीआय) निवड समिती विचार करता. तशें जालें जाल्यार वरिश्ठ खेळगड्यांक 80 दिसांचो विसव मेळटलो.
भारताचो पंगड श्रीलंकेचे भोंवडेर तीन टी-20 आनी तीन वन डे मॅची खेळटलो.
19 सप्टेंबराक बांगलादेशाचो पंगड भारतांत माळो खेळपाक येतलो. ते उपरांत भारताचें वेळापत्रक सामकें व्यस्त आसा. भारताचो पंगड बांगलादेशा उपरांत न्युझिलॅण्डा आड तीन टॅस्टी, ऑस्ट्रेलिये आड पांच टॅस्टी आनी इंग्लंडा आड पांच टी-20, तीन वन डे मॅची खेळटलो. हाचे खेरीत फेब्रुवारी म्हयन्यांत भारत चॅम्पियन्स ट्रॉफींत लेगीत वांटो घेतलो. वरिश्ठ खेळगड्यांचे ताण येवपाक शकता ताका लागून तांकां कांय माळां खातीर विसव दिवपा विशीं निवड समिती विचार करता.
भारताचो पंगड सध्या झिम्बाब्वेचे भोंवडेर गेला. थंय तो पांच टी-20 माळ खेळटा. निवड समितीन अणभवी खेळगड्यांक विसव दिवन युवा पंगडाक झिम्बाब्वेचे भोंवडेर धाडला. ओपनर शुभमन गील पंगडाचें फुडारपण करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.