नागरी पुरवण खात्याच्या गुदांवांत पावस

भांगरभूंय | प्रतिनिधी

पाखें हुबलें; तांदूळ आनी गंवाचें व्हड प्रमाणांत लुकसाण

भांगरभूंय । प्रतिनिधी

वाळपयः आयतारा वादळी वाऱ्याचो मार बसून नागरी पुरवण खात्याच्या होंडा वाठारांत आशिल्ल्या गुदांवाचें पाख्याचे पत्रे हुबून गेले. उपरांत थेट पावस ह्या गुदांवांत घुसून तांदळाची आनी गंवाची व्हड प्रमाणांत लुकसाण जालें. सुमार 13 टन गंव आनी तांदूळ ह्या गुदांवांत सांठोवन दवरिल्ले. ते पावसांत भिजिल्ल्यान व्हड प्रमाणांत सरकाराक लुकसाण जालां.

मजगतीं, त्या गुदावाच्या पाख्यांची ताकतिकेन दुरुस्ती हातांत घेतल्या. सध्या तात्पुरती उपाय येवजण करतले. पावसाळ्या उपरांत सासणाची उपाय येवजण करपाचेर भर दितले, अशें नागरी पुरवण खात्याच्या विभागा कडल्यान मेळिल्ले म्हायती वयल्यान कळटा.

आयतारा वादळी वाऱ्या वांगडा आयिल्ल्या पावसाक लागून सत्तरी म्हालांत व्हड प्रमाणांत लुकसाण जालें. तातूंत होंडाच्या नागरी पुरवण खात्याच्या गुदांवाचें पाखें हुबून गेलें आनी थेट पावस गुदांवांत पडूंक लागिल्ल्यान थंय सांठो करून दवरिल्ल्या गंवाचो आनी तांदळाचो इबाड जालो. एका अधिकाऱ्या कडल्यान मेळिल्ले म्हायती प्रमाण ताकतिकेचो उपाय म्हूण तांदूळ आनी गंवाच्या सांठ्याचेर ताडपत्री घातिल्ली. मात पत्रे हुबून गेल्ल्यान दाळिल्ल्या पोतयांतल्यो वयल्या पोतयांचें कांय प्रमाणांत लुकसाण जालां. सोमारा सकाळीं भौशीक बांदकाम खात्याचे अधिकारी घडणुकेचे सुवातेर आयले आनी तांणी गुदांवाच्या पाख्यांची दुरुस्ती हातांत घेतली. सध्या ह्या गुदावांतलो म्हाल दुसऱ्या गुदांवांत व्हेला.