भांगरभूंय | प्रतिनिधी
कॉग्रेस : उणाक दर्ज्याच्या कामा खातीर काळे वळेरेंत घालपाची मागणी
भांगरभूंय । प्रतिनिधी
पेडणें: राष्ट्रीय म्हामार्ग 66 च्या कंत्राटदाराचीं पुराय घाळपणां आनी सुरक्षिततायेच्यो उपाय येवजण्यो करपांत आयिल्लें अपेस, तशेंच पत्रादेवी ते बांबोळी मेरेनच्या महामार्ग विस्तारीकरणाचें उण्या दर्जाचें काम केल्ले खातीर कंत्राटदाराक बेगोबेग अटक करून काळे वळेरेंत घालपाची मागणी काँग्रेस पक्षान केली.
काँग्रेसीचे प्रदेशाध्यक्ष अमीत पाटकार, विरोधी पक्ष फुडारी युरी आलेमांव, हळदोणचे आमदार अॅड. कार्लोस फेरेरा, केपेंचे आमदार एल्टन डिकोस्टा, सरचिटणीस अॅड. जितेंद्र गांवकार, उत्तर गोंय जिल्हो काँग्रेसीचे अध्यक्ष वीरेंद्र शिरोडकार, पेलाजिया पिरीस हांचो आस्पाव आशिल्ल्या शिश्टमंडळान सोमारा न्हंयबाग आनी धारगळे पालसणां कोसळिल्ले सुवातेक भेट दिवन पळोवणी केली.
म्हामार्ग रुंदीकरण कंत्राटदार एमव्हीआर इन्फ्रा प्रोजेक्ट्स प्रायव्हेट लिमिटेडान केल्ल्या उण्या दर्जाच्या कामाचो मुद्दो कॉग्रेस पक्ष सेगीत उखलून धरता. ह्या कंत्राटदाराच्या घाळपणाक लागून खूबश्या लोकांक आपलो जीव वगडायचो पडलो. आपणे जुलय 2022 त अशाच एका पालसण कोसळिल्ल्या थळाक भेट दिल्ली आनी रस्त्या लागसारा ड्रेनेज वेवस्था नाशिल्ल्याचें दाखोवन दिल्लें. मात सरकार ताचेर उपाय करपाक अपेशी थारलां, अशी टिका अमित पाटकार हांणी केली.
कंत्राटदाराचेर भाजप सरकार कसलीच कारवाय करिना. हाचें कारण तो भाजपाच्या सर्वोच्च फुडार्याचो जांवय. ह्या कंत्राटदारान केल्ले सगळे प्रकल्प उणाक दर्जाचे आशिल्ल्याचें कळून आयलें. मुख्यमंत्री डॉ. प्रमोद सावंत हांणी बेगोबेग ह्या कंत्राटदाराचेर कारवाय करची अशी मागणी विरोधी पक्ष फुडारी युरी आलेमांव हांणी केली.
कांय नेम आनी मार्गदर्शक तत्त्वां कंत्राटदारांनी सरकारी कामां करतना पाळप गरजेचें. हो कंत्राटदार असले कसलेच तरेचे नम पाळिनासतना कामां करता अशें आमदार कार्लोस फेरेरा हांणी सांगलें.
ह्या कंत्राटदारान हातांत घेतिल्ल्या सगळ्या प्रकल्पांचें लेखी परिक्षण करचें अशी मागणी करून शेकड्यांनी लोकांचो जीव घेवपी कंत्राटदाराक भाजप सरकार संरक्षण दिता असो आरोप आमदार एल्टन डिकोस्टा हांणी केलो.
पालसणां कोसळटलीं अशें आपणें सरकारी अधिकार्यांचे नदरेक हाडून दिवन लेगीत ताचेर कांयच उपाय करूंक ना. सरकाराच्या घाळपणाक लागून हें जालें. अशें जितेंद्र गांवकार हांणी म्हणलें. कॉग्रेस पक्ष मुखेल सचीव आनी हेर सरकारी अधिकार्यांची भेट घेवन ह्या मुद्याचेर आवाज काडटलो आनी ताचे उपरांतूय सरकार कारवाय करपाक अपेशी थारल्यार कायदेशीर पर्याय सोदतलो, अशें काँग्रेसीच्या फुडार्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
