भांगरभूंय | प्रतिनिधी
पेडणें, प्रतिनिधी: राष्ट्रीय म्हामार्ग ६६ च्या कंत्राटदाराचीं पुराय निश्काळजीपणां आनी सुरक्षिततायेच्यो उपाय येवण्यो करपांत आयिल्लें अपेस, तशेंच पत्रादेवी ते बांबोळी मेरेनच्या महामार्ग विस्तारीकरणाचें उण्या दर्जाचें काम केल्ले खातीर कंत्राटदाराक बेगोबेग अटक करून काळे वळेरेंत घालपाची मागणी काँग्रेस पक्षान केली.
काँग्रेसीचे प्रदेशाध्यक्ष अमित पाटकार, विरोधी पक्ष फुडारी युरी आलेमाव, हळदोणचे आमदार ड. कार्लोस फेरेरा, केपेंचे आमदार एल्टन डिकोस्टा, सरचिटणीस ऍड. जितेंद्र गांवकार, उत्तर गोंय जिल्हो काँग्रेसीचे अध्यक्ष वीरेंद्र शिरोडकार, पेलाजिया पिरीस हांचो आसपाव आशिल्ल्या शिश्टमंडळान आयज न्हंयबाग आनी धारगळे पालसणां कोसळिल्ले सुवातेक भेट दिवन पळोवणी केली.
म्हामार्ग विस्तारीकरण कंत्राटदार एमव्हीआर इन्फ्रा प्रोजेक्ट्स प्रायव्हेट लिमिटेडान केल्ल्या उण्या दर्जाच्या कामाचो मुद्दो कॉंग्रेस पक्ष सेगीत उक्तायता. ह्या ठेकेदाराच्या निश्काळजीपणाक लागून खुबश्या लोकांक आपलो जीव होगडायचो पडलो. हांवें जुलय २०२२ त अशाच एका पालसण कोसळिल्ल्या थळाक भेट दिल्ली आनी रस्त्या लागसारा ड्रेनेज वेवस्था नाशिल्ल्याचें दाखोवन दिल्लें. मात सरकार ताचेर उपाय करपाक अपेशी थारलां, अशी टिका अमित पाटकार हांणी केली.
ठेकेदाराचेर भाजप सरकार कसलीच कारवाय करिना. हाचें कारण तो भाजपाच्या सर्वोच्च फुडार्याचो जांवय. ह्या कंत्राटदारान केल्ले सगळे प्रकल्प उण्या दर्जाचे आशिल्ल्याचें कळून आयलें. मुख्यमंत्री डॉ. प्रमोद सावंत हांणी बेगोबेग ह्या कंत्राटदाराचेर कारवाय करची अशी मागणी विरोधी पक्ष फुडारी युरी आलेमाव हांणी केली.
कांय नेम आनी मार्गदर्शक तत्त्वां कंत्राटदारांनी सरकारी कामां करतना पाळप गरजेचें. हो कंत्राटदार असले कसलेच तरेचे नम पाळिनासतना कामां करता अशें आमदार कार्लोस फेरेरा हांणी सांगलें.
ह्या कंत्राटदारान हातांत घेतिल्ल्या सगळ्या प्रकल्पांचें लेखी परीक्षण करचें अशी मागणी करून शेकड्यांनी लोकांचो जीव घेवपी कंत्राटदाराक भाजप सरकार संरक्षण दिता असो आरोप आमदार एल्टन डिकोस्ता हांणी केलो.
पालसणां कोसळटलीं अशें आपणें सरकारी अधिकार्यांच्या निदर्शनाक हाडून दिवन लेगीत ताचेर कांयच उपाय करूंक ना. सरकाराच्या निश्काळजीपणाक लागून हें जालें. अशें जितेंद्र गांवकार हांणी म्हणलें.
कॉंग्रेस पक्ष मुखेल सचीव आनी हेर सरकारी अधिकार्यांची भेट घेवन ह्या मुद्याचेर आवाज करतलों आनी ताचे उपरांतूय सरकार कारवाय करपाक अपेशी थारल्यार कायदेशीर पर्याय सोदतले अशें काँग्रेसीच्या फुडार्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
