भांगरभूंय | प्रतिनिधी
न्यूयॉर्क, खबरां संस्था ः आयच्या डिजिटल जगांत ऑनलायन डेटिंग ॲप्लिकेशनांचो वापर खूब वाडला. ताचो वापर करपी हजारांनी लोक आपलो जोडीदार सोद पुराय करतात. पूण ॲप्साचेर चड वेळ घालवप आनी डेटिंग प्रक्रियेंत आशिल्लें लाइक, स्वाइप करप आनी टॅप करपाक लागून जायत्या जाणांक थकवा, निराश आनी एकसुरेपणाची भावना निर्माण जाल्या. ह्या समस्याक तज्ञांनी डेटिंग ॲप बर्नआउट अशें नांव दिलां.
अमेरिकेंत केल्ल्या सर्वेक्षणांत 80% वापरप्यांक मानसीक थकवा येवप आनी डेटिंग ॲप बर्नआउट जावपाची समस्या आसा अशें दिसून आयलां. दुसरे वटेन डेटिंग ॲप्लिकेशनांचो सतत वापर केल्ल्यान वापरप्यांची रिलेशनांतली आवड उणी जायत आसा. डेटिंग ॲपाचो चड आनी सतत वापर जाल्ल्यान अमेरिकेंत मानसीक थकवा आनी एकसुरेपण ही गंभीर समस्या जावपाक लागला. क्लिनीकल मानसशास्त्रज्ञ यास्मीन साद हांच्या मतान 10 मदल्या 8 जाणांक मानसीक थकवा येवप हो चिंतेचो विशय जाला. डेटिंग ॲपांचेर चड वेळ घालप आनी तरी लेगीत जोडीदार मेळना हें थकवाचें व्हड कारण. तांच्या मतान ताचेर उपाय म्हणल्यार वापरप्यांक थकवो जाणावता जाल्यार तांणी ॲप्सांतल्यान ब्रेक घेवचो. हाचे भायर वापरप्यांनी लोकांक मेळपाचो आनी तांचे कडेन व्यक्तिगत रितीन चर्चा करपाचो यत्न करचो. हाका लागून थकवा उणो करपाक मजत जातली.
अमेरिकेंत ऑनलायन डेटिंग 5 वर्सांत 41% वाडल्या
अमेरिकेंत डेटिंग ॲप वापरपी लोकांचो आंकडो 5 वर्सांत 41% वाडला. 2019 वर्सा 4 कोटी 62 लाख अमेरिकन लोक डेटिंग ॲप वापरताले, जे आतां 6 कोटी 5 लाख जाल्यात. ३०% अमेरिकन प्रौढांनी डेटिंग ॲप वापरला. हाका लागून ताची बाजारपेठ सतत वाडत आसा. ताची बाजारपेठ 11,269 कोटी आसा. 2019 वर्सा ताची बाजारपेठ 6,678 कोटी आशिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
