… आनी पंदरा दिसांनी पालसणां परत कोसळ्ळीं
भांगरभूंय | प्रतिनिधी
पेडणें, प्रतिनिधी: धारगळे- महाखाजान गांवांत म्हामार्गा वयलीं पालसणां पंदरा दिसांनी परत दुसरे फावट कोसळिल्ल्यान कंत्राटदाराच्या कामाचो दर्जो कितलो उंचेलो (?) तें दिसलें. विशेश म्हणल्यार आयज मेरेन ह्या कंत्राटदाराचेर सरकारान कसलेच तरेची कारवाय करूंक ना.
११ जुलयाक केंद्रीय बांदकाम मंत्री नितीन गडकरी हे मोपा लिंक रस्त्याच्या उक्तावण कार्यावळीक येवपाचे आसात. तेन्ना तांणी ह्या रस्त्याचें काम कशे तरेन चल्लां, तें सरकाराच्या आवडट्या कंत्राटदारान कशें तरेन केलां हाची म्हायती घेवची, असो थोमणो हांगाच्या कांय नागरिकांनी मारला.
पत्रादेवी ते धारगळे, महाखाजन मेरेनच्या रस्त्याचें एमव्हीआर हे कंपनीक कंत्राट मेळ्ळे उपरांत ह्या राष्ट्रीय म्हामार्गाचें ६६ अशें नामकरण केलें. ज्या दिसा सावन काम सुरू आसा, त्या दिसा सावन हो कंत्राटदार वादग्रस्त थारला. ह्या रस्त्याचें काम करतना कांय जाणांचे जीव गेल्यात. तेन्ना थळाव्यो पंचायती, समाजीक कार्यकर्त्यांनी आवाज केलो. सरकाराक निवेदनाय दिलीं. निवेदनांची दखल घेवन मुख्यमंत्री, उपमुख्यमंत्री, भौशीक बांदकाम मंत्री, अधिकार्यांनी ह्या रस्त्याची पळोवणी केली. समस्या सोडयतले अशीं आस्वासनांय दिलीं. मात आयज मेरेन सरकारान कसलेच तरेचें आस्वासन पाळूंक नाशिल्ल्यान नागरिकांनी तिडक उक्तायल्या.
धारगळे महाखाजनान फाटल्या पावसांत व्हड पालसणां कोसळिल्लीं. तेन्ना कोणाक कांय जावंक ना. ताका लागून एके वटेंतलो मार्ग पुरायेन बंद केल्लो. उपरांत पंदरा दिसां आदीं हांगा पालसणां कोसळिल्लीं. आयज ८ तारखेर परत हांगा पालसणां कोसळ्ळीं. मात कोणाक कांय जावंक ना. अशीं पालसणां कोसळपाच्यो घडणुको परत परत हांगा घडटात. व्हडा प्रमाणांत येरादारी ह्या रस्त्या वयल्यान यो वच करतना फुडाराक एखाद्या वेळार हांगच्यान फातर कोसळ्ळ्यार वाहनांचें लुकसाण जातलेंच वांगडा मनशाच्या जिवाकूय धोको आसा. ताका लागून सरकारान हो विशय खरपणान घेवन कंत्राटदाराक ब्लॅक लिस्टांत घालपाची मागणी नागरीक करतात.
मालपें न्हय बाग रस्त्याचेर ७ तारखेर पालसणां कोसळ्ळीं. त्याच दिसा उगवेंच्या एका रस्त्याचीं पालसणां कोसळ्ळीं. वाहनांचें बरेंच लुकसाण जालें.
रस्ते येरादारी खातीर बंद
धारगळे महाखाजनान जंय पालसणां कोसळ्ळ्यां थंय एके वटेनचो मार्ग वाहनां खातीर बंद केला. धारगळे ते दोन खांब मेरेनचो एकोडो म्हामार्ग येरादारी खातीर उक्तो केला. तशेंच मालपें न्हयबाग हांगचो रस्तो सध्या बंद करून आदल्या राष्ट्रीय महामार्ग १७ वेल्यान येरादारी वळयल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
